Wa damhang kadaugan

Domingo na usab. Nag-alindasay si Fredmon sa pagpangita og kuwarta nga iyang ipusta sa iyang manok nga ugis nga magpunay'g tuktugaok kay kuno magpatari. Sumala sa naandan gihiling niya ang mga dapit sa aparador nga sagad pagabutangan ni Emyat nga iyang asawa sa iyang pitaka.

Apan bisan giunsa nalang niyag tan-aw wala na gayod niya igkita, lahi sa nangaging mga Domingo nga iya kining nakit-an nga isuksuok sa inutaw. Magkuha siyag ipusta sa iyang manok nga magpunay'g tuktogaok.

"Myat, pabayloa ko’g kuwarta, bi," nangahas na gayod siya paghangyo sa iyang asawa.

"Tug-an lagi! Ikaw ang magpunay og kuha og kuwarta sa pitaka, no?" ni Emyat pa nga daw tigreng mihambat.

"Wa, uyyy!!!" nangulipas si Fredmon.

"Aw, kun di ka motug-an di ka kabaylo!" ni Emyat pang nagpaminti.

"Bitaw, Myat, ako ang nagkuha," kalma nga namulong si Fredmon.

"A, ikaw diay haaa!!!" ni Emyat pang milanit sa sanggot ug giduol si Fredmon.

Si Fredmon nga nakalitan mikaratil pagdagan. Didto siya paingon sa payag nga bantayanan nila sa humay nga nahimutang sikbit sa lasang. Awaaw ang maong dapit.

Si Fredmon labihan kasugarol. Namuhi siya’g daghang mga manok nga hiniktan. Wala siya’y makubra sa iyang suweldo sa baradero kay magpunay man siya’g pangutang sa Coop og lawog sa manok nga hilabihang mahala ug ingon man mga bitamina ug tambal alang sa iyang mga hiniktan. Nagnegosyo og biko si Emyat alang sa pamilite ug sa ubang kagastohan sa tulo nila ka mga anak nga nanagtungha. Sa dihang nasera ang baradero gumikan sa union nagpadayon gihapon si Fredmon sa pagpamuhig mga manok. Ang kutob sa magpunay'g tuktugaok iya kining itari pinustaan sa kuwarta nga iyang sinibat gikan sa pitaka ni Emyat. Si Emyat nga nakaamgo dili na ibulag ang pitaka sa iyang hawak.

Samtang nagahigda si Fredmon sa ilang payag mikulikot sa iyang mga dalunggan ang kaguwas nga nagagikan sa lasang.

"Sa ugissss!!! Sa ugissss!" singgit sa kuyme.

Tari man 'ron, tuaw sa hunahuna ni Fredmon.

Midali pagbangon si Fredmon ug miadto sa dapit nga gigikanan sa singgit. Apan lunlon kasiot ang iyang naadtoan. Wala na usab ang kaguwas. Mibalik siya sa payag ug mihigda. Unya, iya na usab nga   nabati ang kaguwas.

"Sa ugissss!!! Sa ugissss!!!" mitigbabaw na usab ang singgit sa kuyme.

"Ilugro na lang 'naaa!!!" may laing singgit nga mitigbabaw.

"Siyete-Diyessss!!! Siyete-Diyesss!!!" may singgit na usab sa kuyme.

Kay wala may mitubag mibangon si Fredmon ug mitambo sa bentana. Unya, hinurot ang tingog misinggit siya: "Sige, kasahan ko 'naaa!!!"

Milanog ang linugapak sa mga manok nga nagsangka. Mikanay usab ang mga suliyaw. Unya, wala madugay...

"Mga higala, segun sa patusik nga inyong nakita,ang ugis maoy migulang mananaogggg!!!" singgit na usab sa kuyme.

Porbida, kun natari pa ang akong ugis, kuwarta na man unta! Panahon karon sa mga ugis hinungdan nga nagpunay tuktugaok kadtong akoa, nagkanayon ang hunahuna ni Fredmon.

"Maayooo!!!! Maayong haponnnn!!!" pangatahoran nga nakapalingi kang Fredmon ngadto sa pultahan. Unya, nasugat sa iyang panan-aw ang puti ug insekong tawo nga didto sa may hagdanan.

Midali pagbangon si Fredmon ug giatubang ang tawo. "Unsay ato, brad?" sukot ni Fredmon.

"Nia ko, brad, kay naghatod sa imong daog. Nakabuno ang ugis nga imong gilugrohan," sa tawo pang mitunol sa binantal nga kuwarta. (Kataposan)