Naghilak nga Bituon

Nahibulong si Jackie sa iyang kaugalingon. Pagkadaghan sa mga lalaki nga nangindahay sa iyang gugma, ang kadaghanan kanila nahitalay sa mga pamilyang tinamod sa katilingban, apan nganong si Ethan man gyud ang iyang gihigugma? Si Jerome Celesta, ang iyang ka-loveteam sa showbiz, nangulitawo kaniya sa tinuod nilang kinabuhi. Apan wala niya sugta si Jerome tungod kay wala siya’y pagbati ngadto niini. Nagpabilin nga si Ethan ang gipangandoy sa iyang kasingkasing bisan ingon sa wala siya’y appeal ngadto niini.

Nakapanghupaw si Jackie samtang namalandong niini. Nasayod siyang usa ka dakong pagpakabuang ang nahitabo kaniya. But she can’t help herself but to follow the dictate of her heart. Kini lang ang nasayran niya nga gusto niyang buhaton aron siya malipay.

Mitarong si Jackie sa paghigda ibabaw sa mahunolhunol nga kama. Gibukotan niya ang iyang kaugalingon sa habol. Gusto siya nga sa maong kahimtang makatulog siya sa maayong paghinanok.

Pagkaugma, nagadasok ang mga tawo sa sulod ug gawas sa Cebu International Convention Center. Diha ang gobernador ug ang bise gobernador nga maoy mosubo sa bag-ong nahuman nga proyekto. Mitambong usab sa maong okasyon ang mga mayor sa magkasikbit nga mga siyudad sa Lapulapu, Mandaue, Cebu ug Talisay. -- Sumpayan pa

Bawion ko ang imong gugma

Ni Rosalie Vallecera

“Ngano man?” Sukit ni Annie. “Di ba naa na man ko’y picture nga naa nimo?”

“Oo. Pero gusto ko’g bag-o.”

Kay diha may retrato si Annie nga gilup-itan niya sa iyang pitaka, iya kining gikuha ug gihatag ni Edelmar.

“Ayaw baya kalimot pagpadala og sulat nako kun tua ka na sa London, ha,” matud ni Annie.

“Sure,” pasalig ni Edelmar. “Dili kay sulat ra. Kanunay sad kong mo-text nimo. Mas maayo sa text kay direkta.”

Wala madugay, milanog ang pahibalo pinaagi sa loud speaker sulod sa passenger’s terminal nga pasak-on na sa barko ang mga pasahero. Nagpanamilitay na sila si Annie ug Edelmar.

Sama sa unang panaglagyo nila ni Edelmar, gipatuloan usab ni Annie og mga luha ang paggikan sa iyang hinigugma.

Paglabay sa usa ka semana, nakadawat si Annie og text message gikan kang Edelmar. Gipahibalo siya sa iyang hinigugma nga nahikay na ang tanang mga papeles nga gikinahanglan sa pag-abroad niini. Kadali rang nahikay ang iyang papeles gumikan sa panabang sa higala sa amahan ni Melinda nga influential kaayo sa Department of Foreign Affairs.

Gipahibalo sab siya ni Edelmar nga gitakda na ang adlaw sa ilang paggikan paingon sa London. Ginaya-naya niya ang iyang gibati.

Gitambagan siya niini pinaagi sa text nga dili lang magpalabi sa kabalaka ug kamingaw kay ang duha ka tuig dili lang mahibaw-an nga molabay. Dali ra kaayong mangligdas ang mga adlaw. -- Sumpayan pa