Gula 9
May pipila na ka tuig ang nakalabay sukad niadtong panagkita nila ni Ethan sa unibersidad nga iyang gitunghaan kaniadto. Niadtong maong panagkita nila ni Ethan, nasayran niya nga dili na makapadayon pagtungha ang ulitawo sa kursong edukasyon tungod kay dili na makasugakod ang mga ginikanan niini sa mga galastohan sa eskuylahan. Usa lang ka mekaniko ang amahan ni Ethan ug ang inahan niini usa ka plain housewife.
Karon, nasayran na lang niya gikan kang Gilda nga nagtrabaho na si Ethan isip usa ka security guard. Excited siyang makigkita sa ulitawo. Labing seguro, misamot ang kaguwapo niini karon. Gimingaw na siya kang Ethan. Apan labing seguro, wala mingawa si Ethan kaniya. Nasayod siya nga usa lang ka casual nga higala ang pag-ila niini kaniya.
Apan dili na kini mahinungdanon alang kaniya. Ang importante mao nga magkakita ug magkasulti sila si Ethan.
Sa laing bahin, ingon sa dili siya makatuo nga magkarelasyon sila si Ethan ug Joan. Suheto siya nga aloof si Joan kang Ethan. Nasayod siya niini tungod kay managsilingan man silang tulo kaniadto sa Guadalupe sa wala pa mamalhin sila si Ethan ngadto sa Mandaue. Awayon kaayo sila si Ethan ug Joan kaniadto, mora’g iring ug iro nga magbinanghagay gayod kun magkaduol.
Mao nga nakugang siya sa gibalita ni Gilda nga mag-on na sila si Ethan ug Joan. Wala siya magdahom nga magkatakdo ang pagbati sa duha. Ug sakit kini alang kaniya tungod kay gimahal man niya sa hilom si Ethan. -- Sumpayan pa