Ikiha unta ang mayor

Gusto unta ming mopasaka og kaso attorney, ni Andrea sa paglingkod niya sa lingkuranan atubangan sa lamesa ni Atty. Brendo Cortes sulod sa iyang bupete sa Subangdaku. Kuyog ni Andrea karong Sabado's buntag si Concha iyang manghod. Duha ra silang managsoon. Puro dalagang guwang. Patay na ilang mga ginikanan. Kababata ug silingan sila ni Brendo. Maong dako sila’g pagsalig sa abogado.

"Unsang kasoha ug kinsay inyong ikiha?" ni Brendo. Iya sang gipalingkod si Concha. Gitudlo niya ang laing lingkuranan sikit sa tuong tumoy sa iyang lamesa. "Ang mayor gud sa atong lungsod sa Embera", ni Andrea. "Mayor gyud imong ikiha? Unsa may sala sa mayor?" ni Brendo. "Nakigkontrata siya sa Smart ug Globe. Gipatukuran og transmitter tower among yuta. Gipaabangan niya. Siya ang nagkolekta sa binulang abang. Singkwenta mil pesos iyang masapi matag bulan. Kay tag bayente singko mil man ang abang sa matag tower", ni Andrea. Malagoton.

"Delikado ang kahimtang sa mayor, kun mao kana. Posible siyang makiha og Usurpation of Real Property, Estafa ug Violation of Anti-Graft Law o hain lang ana", ni Brendo. "Kana gyud, attorney", abiba ni Chona. "Bitaw. Ato unang klarohon sa di pa ta mangaso. Seguraduhon nato pinaagi sa ebidensiya nga modaug gyud ta", ni Brendo. Nipahiyom. "Unsa may mga ebidensiya atong gikinahanglan?" ni Andrea. "Primero, kun may titulo ba inyong yuta? Kun wala, may tax declaration ba? Survey plan, technical description, tax clearance ug tax receipts. Ug Sketch mahitungod sa mga tower kun naa ba gyud sulod sa inyong yuta", ni Brendo.

"Ang among lola ang tag-iya sa yuta.Patay na siya. Inahan siya ni papa Ernesto. Naa mi anang tanan nimong gihinganlan", ni Andrea. "Maayo. Morag lig-on atong kaso. Apan sultihi kuno ko sa kaagi ining loteha", ni Brendo. "Sayo mang nabiyuda si lola. Iya tong gibaol ang yuta. Lakip na nang gitarokan ron sa mga tower", ni Andrea. "Kanus-a niundang og baol imong lola?" ni Brendo. "Duha ka tuig sa wa pa siya namatay. Pagsugod niya’g sakitsakit sa tuig 2004, niundang siyag panguma. Labi na nga gihimoa’g barangay road among yuta", ni Andrea. "Duna ka bay Cadastral Map diin makita inyong lote, barangay road ug ang gitarokan sa mga tower?" ni Brendo. "O, attorney," ni Andrea. Gikuha niya ang dakong brown envelope nga gisabak ni Chona. Gitunol sa naulahi. Gihikyad ni Andrea ang plano ibabaw sa lamesa sa abogado. Gitudlo niya sa abogado ang Lot No. 1 sa ngalan ni Felina Barro ilang lola; barangay road ug Lot 2 nga naa sa ngalan sa Municipality of Embera.

"Sa ato pa ang gitarukan sa mga tower, yuta diay sa munisipyo?" ni Brendo. "Maoy naa sa Cadastral Map. Apan sa wa pa nang barangay road, among gitikad nang yutaa. Wa man gyud mi badlonga sa mayor sukad masukad, bisag sa una pang mayor sobra na bayente anyos", ni Andrea. "A bisan og unsa ka dugay sa inyong pagtikad sa dili inyong yuta, dili gyud mainyo", ni Brendo. "Mao ba, attorney?" nauknol si Chona. "Kaniadto sa wa pay survey ug wa pa nalatid ang barangay road, nagtuo lang seguro inyong lola nga ang gidak-on sa inyong yuta, hangtud pa sa yuta sa munisipyo. Karon nga na-survey na, nasuta nga inyong yuta lang sa dikit barangay road. Tabok ana, yuta na sa munisipyo o sa gobyerno", ni Brendo.

"Wa diay mi dag-anan kun mokiha?' ni Andrea ug Chona. Hapit nagdungan og sulti. "Tataw nga wala gyud" ni Brendo. Niluta ang kadismayo sa mga hitsura sa managsoon. "Paghuwat lang mo basig ang Sun, TMB o ubang Cell phone companies mopatarok og tower sa inyong lote", dugang ni Brendo. "Mao na lang gyud na among panghinauton" ni Andrea. Gihipos niya ang plano. Gipilo. Gisulod pagbalik sa envelope. "Pilay among bayranan sa consultation, attorney?" ni Chona."Okey ra. Way bayranan. Ako lang unya pahimoa sa Contract of Lease kun may moabang na sa inyong lote. Anha nako magpabayad kun mahinayon na", ni Brendo. Mapahiyumon gihapon. "Salamat. Unya segurado nga ikaw gyud among pahimoon sa kontrata kun may gustong mogamit sa yuta", ni Andrea. Nanindog ang managsoon. Ug nanamilit sa abogado. (Kataposan) (Sa gusto’g libreng konsulta, dad-a ning pahina sa opisina sa tagsulat. Sa Sabado sa buntag)