Sugilanon Siakoy

Hoy! Bata pahawa diha ha," sa edarang dalaga pa nga si Alynn," nagda ka la’g demalas sa akong paninda da. Hala, masuko gani ko, i-apil tika gyud pagluto sa siakoy."

"Di man ko manghilabot," ni Tisay pa, nga usa ka batang libud-suroy, "motan-aw ra man ko ... sa linuto mong siakoy, manang Alynn."

"Sus, kabaho ba aning bata-a uy," misamot nga gisapot si Alynn kay nagkamuritsing lang ang dagway sa bata sa kahugaw niini. "Dali, palayo bi."

"Maluoy ka tawon, Nang," gibunlot ug giguyod kini paggawas sa iyang tindahan ngadto sa daplin sa karsada. Atol sad maoy paghunong sa polis patrol car, kay mopalit kini’g siakoy.

"Oh, ngano man tong bata giunsa nimo?" Misuna kaniya ang polis kay misutoy man kini pagdagan, pag-abot nila.

"Adaa, nagsamoksamok lang tong bata-a diri, hugaw kaayo tan-awon." Nagdali kining may gikuhang pinutos nga siakoy nga inorder nila kada buntag.

"Aguy, sus kalami ba gyud anang siakoy mo." Matud sa usang polis nga pilyo kaayo'g tinan-awan kang Alynn, "mora ma’g di ta pul-an mo-ari dinhi."

"Ayay ... mora’g lain na nang siakoya ang gipangita da," nahimuot pag-ayo si Alynn nga mi-abi-abi sa suki niyang mga polis.

Bisa’g nagkadusingot siya sa pagpanluto'g siakoy, bisa'g edaran na ni, sexy ug gwapa gihapon, ilabi na'g mamostura. Karenyosa siya, maong daghan siya og mga suki. Limpyada, di gustong may hugaw nga makita sa iyang tindahan. Sapoton kini sa hugaw ... sama sa batang bulingit kaayo ang dagway.

Usa ka buntag sayo niana ... may nag-inusarang suki, nga milingkod aron mokaon ug pagsuna usab kay dugay na kining nangulitawo kang Alynn.

"Timan-i lang day ... kun di ka man makuha sa langit," sa lalake pa nga giyawaan ang mga mata niini nga mibahad kaniya," ipaagi ko ikaw sa impyerno aron di ka na makabalibad kanako."

"Way uwaw! ... Bastos!" Napungot siya sa gisulti sa lalake ug iyang gitamparos. "Sige buhata kuno ... basin magmahay ka lang unya."

"Aha ... may gisaligan ka diay aber?" Dali kining misulod sa tindahan dayong gakos ug kalit siyang giukoban sa mga halok." Uhmm ... unsa lami no?"

"Hoy! Unsa na?" Mibadlong ang polis. Ganiha ra diay siya gipanid-an. Nawa ang gutom nila kay nakasiakoy sila’g dakung iho nga hari sa tigpayuhot sa mga droga. Mitalikod ang nakaposas nga lalake nga mitan-aw kang Alynn nga maoy hinungdan sa iyang pagkasikop.

Paglabay sa mga bulan, misikat ug midaku ang siakoyan sa Sugbo ni Alynn diha duol sa dakung mall. Kay nakadawat man kini'g dakung pabuya gikan sa kapolisan. Nakita niya pagbalik kadtong batang bulingit nga nagmalimos sa mga suki niya. Gipasagdan lang niya kay di man sad mosud sa tindahan. Magabii anhi na matug nga magbanig la'g karton.

Usa ka gabii ana, mingaw na kaayo apan nakamata ang bata ug milili kini kay may nabati kining kasikas didto sa sud sa tindahan.

"Hala, gisiakoy si Nang Alynn sa mga lalake." Midali kini pagdagan paingon sa karsada, nagwarawara. May gani may polis patrol nga mihunong. Nanawag sab og mga kaubang patrol car, human misumbong ang bata.

"Daghan salamat ninyo, sir." Ni Alynn pa,"kay di lang unta salapi ug dungog ang masiakoy kanako kun di hasta usab ang akong kinabuhi."

Mao kini ang gisaysay sa tagdumala sa mga dagkung tindahan ni Alynn, nga iyang sinagop nga kanhi mao ang batang bulingit ang iyang anghel.

May panultihon nga, "lapokon man apan may bulawan". (Katapusan)