Bawion ko ang imong gugma - Gula 49

Wala na lang motingog si Annie. Iya usab natimbangtimbang sa iyang kaugalingon nga wala man usab niya tug-ani si Edelmar mahitungod kang Melvin. Hangtod karon walay kasayoran si Edelmar nga nangulitawo si Melvin kaniya. Apan alang kang Annie, wala kini makaguba sa ilang honesty sa usa’g-usa.

“Mosugot ka ba, An?” Misukna si Edelmar pagkilab sa pipila ka daklit. “Nga mo-abroad ko?”

“Mao na man kaha kanay imong hukom,” ni Annie.

“Oo, pero gusto ko nga mo-abroad nga may pagtugot gikan nimo.”

“Mao man kaha kanay sabot ninyo ni Melinda?”

“Wa pa ko mo-commit niya. Giingnan ko siya nga makigsulti pa ko nimo.”

“Nasayod diay siya bahin nako?”

“Oo. Niadtong nag-eskuyla pa mi, gitug-anan ko na siya nga may girlfriend na ko -- nga mao ikaw. Kanunay man gani ming maghisgot nimo.”

Mora’g na-flattered og diyotay si Annie sa gisulti ni Edelmar. Gipasigarbo diay siya sa iyang hinigugma ngadto kang Melinda nga higala niini.

“Sige,” mihukom na gyud si Annie. “Mosugot ko nga mo-abroad ka. Pero duha ra baya gyud ka tuig, ha.”

“Sure,” ni Edelmar pa nga iyang namatikdan nga labihang lipaya gumikan sa iyang pag-uyon.

Apan sa kahiladman ni Annie, nagsubo siya. Iyang gikabalak-an ang umaabot nga panaglagyo na usab nila ni Edelmar sa ikaduhang higayona. -- Sumpayan pa