Modugo pay uhong

Si Goyong naila na sa iyang pagka tigpangambush kun dunay mag-inom nga mga palainom sa alak nga makahubog. Moapupa dayon si Goyong nila aron makaapil og inom.

Apan ang nakaparat kay dili gyud mogasto si Goyong sa kaugalingon niyang kwarta aron ipalit sa alak. Sa panultihon pa, "modugo pay uhong."

Sa laing bahin, ang magkabarkada nga sila si Goddy, Rene, Bentot ug Dodong nakahimo niini o diskarte ni Goyong. Usa ka higayon sa dihang nagkakuyog ang upat ka managhigala.

"Kinahanglan nga sa makausa ug kataposan, hunongon naa kining tinonto ni Goyong. Kinahanglan nga leksiyonon na nato kining animal nga dako!" si Goddy ang unang misulti.

"Bitaw. "Kinahanglan gyud pakgangon na gyud kining iyang binuang!" misagbat si Rene sa bug-at nga tingog.

"Kinahanglan gyud nga dili na padahanon kining pagpangutoy ni Goyong sa mga tawo. Maayo niya, no, nga magpatuyang lang siya’g suyop sa alak nga dili niya gasto!!!" ni Dodong pa.

"Kinahanglan nga magplano kita og paagi nga masumpo na gyud kining gibuhat ni Goyong. Kay ang mga sama kaniya dili angay'ng pasanayon, kun dili wagtangon dinhi sa kalibutan!' matud ni Bentot.

"Unsa ba kahay ato karong buhaton?" ni Rene nga nangutkot sa iyang ulo.

"Bitaw, no..." misumpay si Dodong nga gibati usab og kalibog.

Ang tulo ka managhigala mahilom. Dugay ang ilang kahilom. Unya, pagkataudtaod.

"Aaaah... misantop na ang maayong ideya sa akong hunahuna!" napasalta ang tingog ni Goddy.

Unya, sa misunod pang higayon, mipaduol na usab si Goyong kanila sa dihang may quorum sa inom. Miduol pod si Goyong kanila. Apan wala kini nila tagda.

Kay hangol kaayo si Goyong sa inom, wala gyud kini mobiya. Wala na motunol sa baso ang tulo. Wala lang gihapon mopahawa si Goyong.

Hinungdan nga sa kataposan gisinghagan kini ni Goddy. “Ang sulbad niining tanan -- dunggabon ko kini sa akong pinaypay nga korta aron modugo na gyud ning tawhana nga modugo pay uhong". Niini, kalit nga misibat si Goyong sa maong pundok. (Kataposan)