Handumanan sa Pista

“Tess! Salamat nga nagkita ta pag-usab!” matud ni Andro, apan miliraw ang mga mata niini sa palibut. Nasabut ni Tess nga nahadlok si Andro nga makit-an kini sa iyang asawa nga nag-estorya.

“Minyo ka diay Andro?” gipahimudsan ni Tess ang pagpangutana. Bakante ang sikbit nga mga lamesa ug wala kaayo’y makadungog sa ilang gipanagsultihan. “Pasayloa ko Tess, apan wala man usab ko moingon nga ulitawo ko sa atong panagkaila,” ni Andro pa.

Samtang sila nagsultihanay, kalit lang misibat si Andro, ingon sa may gikahadlokan. Gibiyaan ra gani si Tess. Mibalik diay ang asawa niini mao nga gisugat kini ni Andro aron dili sila masakpan si Tess.

Wala na motiwas pagkaon si Tess, milakaw siya ug didto sa layo gilantaw sila si Andro ug ang iyang asawa. Nakita niya nga nagkuyog kini ug sa iyang asawa pagpanglakaw. Gikan niadto wala na sila magkita pa.

Milabay ang mga buwan, mipauli na lang si Tess sa ilang dapit sa Maño, San Remigio kay daku na ang iyang tiyan. Hangtud nga gipanganak ni Tess ang himsog nga batang babaye.

Daghang mga adlaw nga giitus ni Tess ang iyang mga luha sa paghinilak. Giangkon niya nga nasayop siya nga sayon-sayon ra nga mitugyan sa iyang pagkababaye kang Andro nga bag-ohay pa lang niya nga nakaila.

Tulo ka buwan na ang anak ni Tess, iyang apelyido ang gipadala niini. Pista na usab sa Bogo – Mayo 27 – gikan si Tess nga misimba sa simbahan ni San Vicente de Ferrer. Nakahukom si Tess nga isuroy ang iyang anak sa plaza sa lungsod aron malingaw sa mga talan-awon.

Takulahaw lang nga may miagbay ni Tess samtang nagtindog siya duol sa usa ka ferres wheel. Sa iyang paglingi, si Andro ang diha sa iyang tupad. “Minyo ka na diay Tess?,” nangutana si Andro.

Igo lang siya nga milingo-lingo ug milakaw samtang nagkugos sa iyang anak. Apan misunod kaniya si Andro. “Palihug Tess, makigsulti ko nimo, wala ka nay kabalak-an kay nagbuwag na mi ug ang akong asawa,” pasabut ni Andro.

Giprangkahan ni Tess si Andro nga hingpit na niyang gibugto ang ilang relasyon. “Bisan og nagbuwag pa kamo ug ang imong asawa Andro, wala na ko’y labot nimo. Wala kay baruganan ug wala kanimo ang akong gipangita sa usa ka lalaki nga motubag sa iyang kaakohan.”

Gibiyaan ni Tess si Andro nga daw natuk-an sa iyang nadungog. Gisapnay ni Tess ang iyang anak nga maoy handumanan sa miaging pista. (Kataposan)