Kadtong tawo nga iyang gitimbaya

Sulod sa basement sa Country Mall, duol sa kan-anan Lumpia House, naglingkod si Hector sa usa ka bakanteng lingkuranan. Usa ni sa daghang lingkuranan naglaray alang sa mga customer sa mga kan-anan sa basement.

Diha lang siya maglingkodlingkod. Naghuwat sa iyang kapikas nga si Wanda nga namalit og grocery balig usa ka semana nilang konsumo. Sabado ron sa buntag. Alas diyes ang takna, sumala sa wall clock gibitay sa Lumpia House. Siya ang drayber sa iyang kapikas. Giparking ilang Isuzu Crosswind sa parkingan sa gawas.

Nagbasabasa siya’g nobela samtang naghuwat. Pinalit niya ang maong nobela sa bargain books sa ikaduhang andana sa Country Mall.Nag-ulohan ang nobela og Earthly Powers. Sinulat ni Anthony Burgess usa ka banggiitang nobelista nga taga-London. Niabot siya sa anib nga puol basahon. Moyahat siya panagsa. Motan-aw sa mga tawo nga intrisale sa basement. May lalaki nga nilingkod sa atubangan niya. Nagdala sab og libro. Seguro pareha niya nga maghulat sa kapikas nga nangompra.

"Hi! Good morning, brod" gitimbaya niya. Kay gusto siyang makig-istorya sa tawo nga daw kaedad ra niya.

Gipahiyoman niya ang tawo. Nitan-aw lang niya ang tawo. Daw bata nga nahadlok makig-istorya’g dakong tawo. Dugay nga nagtotok niya ang tawo nga way tingog-tingog. Niduko na lag balik si Hector. Nipasangil og basag balik sa nobela. Bisag wala na masulod sa iyang ulo ang nabasa. Ug dili na siya ka-concentrate niini.

Usa ka seaman si Hector. Iyang lisensiya segundo opisyal. Tulo ka bulan lang iyang trabaho. Human sa tulo ka bulan, bakasyon siya’g usa ka bulan. Maong sa usa ka tuig, balig siyam ka bulan lang iyang matrabahoan.

Apan wa siya maglisod sa kuwarta. Kay dako siya’g suweldo. Overseas man iyang gisakyang bapor. Biyahe’g Singapore ug Hong Kong. Pinakadakong shipping lines sa London ang tag-iya sa bapor iyang giserbisyohan.

Si Wanda nakahuman og Accountancy. Apan wa niya patrabahoa. Gusto ni Hector nga si Wanda gyud mismo ang mangunay sa pag-atiman sa ilang duha ka anak babaye nga naa pa sa Kindergarten. Sila si Daphne, 6 anyos ug si Daisy, 5 anyos. Duna lang silay all around nga maid sa balay.

Nagpuyo sila sa Green Meadow Village sa Talamban. Pinakadako ang maong subdivision sa Talamban. Nakapalit si Hector ug house and lot sulod sa maong subdivision pagpasar niyas board exams para sa segundo opisyal.

Dugay pa siyang makaeksamin sa para primero opisyal kay nagkinahangla’g unom ka bulan nga review. Wa man sab hinoon siya magdali sa iyang promotion. Kontento man siya sa kasamtangang posisyon.

Nagpasiplat panagsa si Hector sa tawong iyang gitimbaya. Nagtotok lang gihapon niya. Morag bata nga nagtanga nga nagnganga. Mobo og buhok ang tawo. Army cut ang tupi. Whiteside wall. Nagsul-ob og maong nga long pants. Guma ang iyang sapatos. T-shirt nga orange ang bulok sa iyang gisul-ob.

Naglibog si Hector kun bungol ba kaha ning tawhana. Wa ba kaha kasabot sa iyang gisulti. Basig di ni siya kasabot og Iningles. O kaha dili ba kaha siya taga-Sugbo. Giyangoan ug gipahiyoman ni Hector pag-usab. Nipakli ang tawo sa unang pahina sa libro nga iyang gidala. Unya gisira niya’g balik. Nitindog siya. Nilakaw nga way tingogtingog. Ug napasiklapan ni Hector ang ulohan sa libro nga basahon unta sa tawo. "How To Cure Shyness".

Shy diay kaayo tong tawhana. O manggiulawom kaayo. Mahadlok makig-atubang og tawo.

"Basin pa sunod namong kita makatimbaya na siya’g balik nako," tuaw ni Hector sa hilom. Nakapanglingo siya. Ug nipadayon nalang siya’g basa sa iyang nobela. Bisa’g puol na basahon.  (Katapusan)