Naghilak nga Bituon

Gula 1

Paggawas ni Jackie Rojas sa arrival area sa Mactan Cebu International Airport, gisugat dayon siya sa iyang mga fans. Mihugyaw sila pagkakita kaniya nag-ilogay sa paglamano sa iyang kamot.

Bisan may escort siyang duha ka bodyguard apan maglisod sila sa pagpiog sa bul-og sa mga tawo nga misugat kang Jackie. Ang iyang mga ginikanan didto ra gani sa layo. Wala na sila makapaduol sa ganghaan sa arrival area tungod kay nagpunsisok ang mga tawo nga nagpaabot sa iyang pagbalik sa Sugbo.

Dihang gikahimamat na ni Jackie ang iyang mga ginikanan, misanong siya sa usa ka press conference uban sa mga sakop sa media sa Sugbo nga buot mo-interview kaniya. Dihay taga print and broadcast media nga misukitsukit kaniya.

Usa na ka sikat nga artista sa puting tabil ug mag-aawit si Jackie. Nakahimo na siya’g pelikula ug soap opera sa telebisyon. Nakapagawas na usab siya sa iyang debut album.

Ang naghatag kaniya’g break nga makasulod sa showbiz mao ang artista search nga gipasiugdahan sa UBS-CVN, usa ka giant television network sa kaulohan. Siya ang migulang grand champion sa maong artista search hinungdan nga daghan dayon ang mga proyekto nga gi-offer kaniya. Wala ug tuo ang mga proyekto nga gitanyag kaniya nga wala usab niya balibari hinungdan nga kalit kaayo ang iyang pagsulbong ngadto sa kabantog. -- Sumpayan pa