Ispoting nga nakigbasketbol

Natumog na sa singot si Roger ning sayong kabuntagon samtang nag-itsa-itsa og bola sa basketbolan duol sa ila. Nagdribol siya’s bola sa walang kamot padulong ngadto sa goal sa silangang habig.

Niitsa siya’s bola ginamit ang walang kamot. Ika-otsenta na ni niyang itsa. Wa masulod ang bola sa ring. Nibanda sa board. Unya pag-untol sa bola ngadto sa dapit sa iyang wala, may tawo nga nisalo sa bola.

"Magpasingot ta, Bosing!" matud sa tawo nga daw desente ug ispoting. Nagsul-ob siya’g shade. Nagdiyaket og itom. Nagkarsones og itom nga gabardine. Nagsul-ob og itom nga sapatos panit. Ug nagkwentas siyag pito. Sa tan-aw ni Roger, barangay tanod ning tawhana. Apan way angay nga magdula og basketbol kay ispoting man siya.Hapit makamug-ot si Roger nga nagtutok sa tawo. Kay wa pay laing nagduwa sa basketbolan, sila rang duha karon nag-atubang.

Sa tinuod lang maglagot gyud si Roger kun istorbohon sa iyang pag-itsa-itsa. Dili man siya kamaong modula og basketbol. Ideya lang ni niya sa pasingot. Dagandagan taboktabok sa duha ka goal. Dinhi sa basketbolan sa baryo Tikalbo nga duol ra’s iyang gipuy-an nga balay ug opisina nga giabangan, alas singko sa buntag mag-itsa-itsa na siya. Sa tibook semana, lima ka adlaw iyang pasingot. Lunes ug Martes, Miyerkules, mopalta siya kay mosimbag sayo sa Redemptorist. Dayon Huwebes. Biyernes, mopalta siya kay mosimba’g sayo sa Basilica. Dayon Sabado’g Domingo.

Sinto singkuwenta ka itsa, wala’g tuo ang kota niya karon. Nagdala siyag duha ka t-shirt nga ilisan. Inig human sa kada singkuwenta ka itsa, mag-ilis siya. Karon, mapugos nalang siya pag-ilis kay may niisturbo man niya.

"Ikaw na lang una pag-itsa-itsa kay mopahuway una ko," ni Roger dayong lakaw padulong ngadto sa goal sa kasadpang habig. Gisablay niya iyang t-shirt ilisan sa usa ka kabelya sa haligi sa goal. "Magbasket una ta. Pasingot. Hingigo bitaw ka. Sige man tikang kit-an dinhi mabuntag. Inig agi nako," sa tawo nga nagdriboldribol sa bola.

Nakapanglab-ok og laway si Roger. Niturok hinoon iyang pagduda nga naniid ning tawhana niya. Duna ra bay nanghulga niya’s telepono. Nitawag nga buk-an kono siya’s ulo kay nanistigos pabor sa kontra sa kaso sa nitawag. Dunay paryente si Roger nga nihangyo magpatestigos mahitungod sa buroka sa yuta sa iyang paryente. May kasayuran siya sa maong transaksiyon.Apan ang kampo sa pikas, di gustong mosulti siya’s tinood. Duna siya’y mga death threats nga nadawat. Patagong gisiksik ni Roger og tan-aw ang tibook lawas sa tawo. Kun may dala bang armas.

"Di man ko kamaong mobasket. Dagan-dagan man lang ni ako. Driboldribol. Ang pag-itsa’s bola, pahuway lang na nako," ni Roger nga daw nag-am-am og bata. Nakaginhawa siyag luag nga way nag-igdal sa hawak sa tawo. Sa iyang propesyon nga civil engineer, 50 nay edad, gitambagan si Roger sa doktor nga magpasingot tungod sa iyang dayabitis. Nag-itsa-itsa nalang ang tawo pagbiya ni Roger. Nilingkod si Roger sa sementong lingkuranang gihimo alang sa mga tumatan-aw sa basketbol kun may liga.

"Kinsa man nang tawhana, Noy Duar?" nangutana si Roger ni Noy Duar nga may tindahan ug balay duol sa basketbolan. Nagpalansad siya’s iyang mga manok hiniktan kilid sa basketbolan. Nakatawa si Noy Duar nga nagtan-aw sa tawo nga nagbasket. "Buang man na!" ni Noy Duar. "Magsige gyud na’g hangad-hangad ug mag-ihap sa mga panganod kun moagi diri," dugang niya. "Mao ba? Abi man nako’g barangay tanod. Kay may gikwentas mang pito!" ni Roger. Nahingangha gyud siya.Ug nakatoo nga buang ang tawo.Kay way tarong og pangisip magbasketbol nga ispoting kaayo.

Gihulat na lang ni Roger nga mapul-an ang tawo sa pag-itsa-itsa. Iya na lang tiwason ang kota inig uli sa bola. Samtang si Noy Duar nagsige’g katawa nga nagpalansad tagsa-tagsa sa lima niya ka hiniktan. (Kataposan)