Kamatayon sa Panumpa - Gula 82

Dihadiha midagan si Xenia ngadto sa nahimutangan ni Norman. Ug gigakos niya kini tungod sa tumang kahinangop.

Unya, kalit lang siyang gimandoan ni Norman paghapa sa yuta. Ug dihay milanog nga mga buto-buto.

Kun wala pa dayon makahapa sila si Norman ug Xenia, seguradong maigo sila sa nagpungasing mga bala gikan sa duha ka tawong armado nga mipusil kanila. Mibalos pagpabuto si Norman ug naigo niya ang duha ka kaaway.

Apan daghan diay og back-up ang mga kaaway nga napatay ni Norman. Nakigpinusilay siya kanila. Takilid ang sitwasyon alang kang Norman. Maayo gani kay miresponde dayon ang kapolisan sa presinto nga nahimutangan duol sa plasa. Napatay sa mga polis ang mga tulisan.

Dihay tulisan nga misurender nga buhi. Kini ang mitug-an sa tanan nga buot masayran sa kapolisan bahin sa Salandanan Robbery Group. Ang kuwarta nga sulod sa brief case nga gidala ni Xenia gi-turnover sab ngadto sa mga kamot sa mga awtoridad.

Paglabay sa usa ka semana, maoy nahimong init nga balita sa mga pamantalaan, radyo ug telebisyon ang pagkapuhag sa Salandanan Robbery Group. Daghang mga sakop sa maong pundok ang napatay sa kapolisan. Ang uban misurender nga buhi. Lakip sa gidakop mao ang pipila ka scalawag nga polis nakigkunsabo sa mga tulisan. -- Sumpayan pa