Kapakyasan

Nahipugwat si Maria sa iyang pagkahinanok sa dihang mi-ring ang iyang selpon. Iya kining gikuha ug gidaitol sa iyang dalunggan. Tingog sa usa ka babaye nga masuk-anon, ang iyang nadungog.

"Hello! Uyab mo ni Joemar?"

"Oo, ngano man diay -- may problema ba? Nganong medyo nasuko kaman?"

"Uyab man sab ming duha ug buntis na ko."

Dili masabtan ni Maria ang iyang gibating kalagot ngadto sa iyang hinigugma sa nasayran nga nakabuntis kini sa laing babaye. Nianang pagkasunod nga gabii, iyang gitawagan ang babaye nga mitawag kaniya.

"Hello! Miss, di ba ikaw man tong mitawag nako gabii, no?"

"Oo, ako, Di ba ikaw si Maria?'

"Oo, unsa toy imong ngan?"

"Ako diay si Elena. Pasayloa ko sa kasuko nako nimo, ha."

"Elena, ayaw kabalaka sa gibuntis mo, kay akong ingnon si Jeomar nga iya kang pakaslan.

Di ko mosugot nga di siya manubag sa umaabot mong anak," mipasalig si Maria.

Iya dayong gitawagan ang ulitawo nga makigkita siya niini. Tuod man, sa nagkita na sila, gipahungaw sa dalaga ang iyang gibati nga kahiubos ug kasakit. Naghilak ang dalaga nga misulti kaniya.

"Magbulag na kita, Joemar ug pakasli si Elena."

"Ikaw may akong gihigugma, dili man si Elena."

"Pakasli si Elena kay malipayon kong magsud-ong kun imo siyang pakaslan."

Nalukmay si Joemar sa hangyo ni Maria. Gipakaslan niya si Elena ug didto sila manimuyo sa Mindanao. Sulod sa unom ka tuig, walay kalinaw ang ilang pagpuyo kay magsige lang og away. Nakahukom kini nga mouli sa Cebu ug mitrabaho kini isip security guard.

Nagkita sila usa ka higayon ug gipadayag sa lalaki ang iyang kahiubos sa dalaga tungod sa tanang hitabo sa iyang kinabuhi.

"Nganong magmahay ka man nga may asawa ka na man ug anak?''

"Mao lagi unta, Maria, apan dili man kami magkasinabtanay kay labihan man ka maldita."

"Na, hala, ayaw na'g kaguol kay sukad karon ikaw na ang akong BF."

"Unsa man nang BF?"

"Best friend. Kung may problema ka sulti lang kay atong tabangan aron masulbad ang imong suliran."

Diha magsugod ang ilang panagsuod ug naglamanohay sila.

"Niadtong managtrato pa ta imo kong gipakyas, karon, ayaw na gyud ko pakyasa. Ayaw na ko kabuangi, pahinumdom lang higala ra ta, basin molapas ka." (Katapusan)