Kamatayon sa Panumpa

“Hain ka man karon manawag?” Nangutana si Norman.

“Dia ra’s atbang sa Plaza Independencia.”

“Okey. Moanha ko karon dayon. Sa Plaza Independencia na lang ta magkita. Okey?”

“O-okey...”

Human sa panagsulti nila ni Norman sa telepono, mibalik dayon si Xenia ngadto sa plasa. Milingkod siya sa lingkoranang semento. Matag karon ug unya magpanglingi siya sa palibot. Nag-ampo siya nga mahiabot na unta si Norman sa plasa.

Paglabay sa mga napulo ka gutlo, may nalantawan si Xenia nga usa ka lalaki nga nagpaingon sa iyang nahimutangan. Apan dili si Norman ang maong lalaki. Namay-ongan niya kini. Usa kini sa mga tawong armado nga migukod nila ni Reno kagabii didto sa usa ka hotel.

Tungod sa kakuyaw nga gibati, si Xenia wala makalihok sa iyang gilingkoran. Misamot ang iyang kalisang dihang mibunot og armas ang lalaki ug gitumong kini kaniya. Apan dihang milanog ang mga buto-buto, ang lalaki maoy nihagba sa yuta.

“Xenia...”

Milingi siya sa gigikanan sa tingog nga nagsangpit sa iyang ngalan. Maoy iyang nakita si Norman. Si Norman diay ang nipusil sa lalaki nga buot untang mopatay kaniya. -- Sumpayan pa