Bawion ko ang imong gugma

Gula 41

“Sagdi lang, Ed,” niya pa. “Muabot ra gihapon ang suwerte alang kanato.”

“Lisod kaayo rong panahona kun way trabaho,” nagkanayon si Edelmar.” “Maayo unta kadto og nakapasar ko sa board exam kay magsugod na ko’g pangaplay isip magtutudlo.”

“Nan, unsa may plano mo karon?”

“Mangaplay una ko’g trabaho sa mga mall. Laay kaayo kun magsige lang og estambay unya walay income.”

“Ikaw ang mag-igo.”

Adlaw’ng Domingo. Gisungko si Annie ni Edelmar sa iyang gipuy-an. Giagni siya sa hinigugma nga manuroy sila sa downtown. Kay walay lingaw, mikuyog si Annie sa iyang hinigugma sa pagpanuroy.

Nanimba una sila. Pagkahuman, nangaon sila sa outlet sa Jollibee atbang sa Metro Gaisano. Si Edelmar ang mibangka sa ilang nagasto. Kuwartahan si Edelmar kay bag-o lang kining nagsuweldo. Bag-ohay pa lang nakatrabaho si Edelmar isip diser sa Colonnade Mall.

“Kumosta ang imong trabaho?” Pakisayod ni Annie samtang nagpadayon sila pagpangaon.

“Okey ra man,” tubag ni Edelmar. “Pero gamay ra lagi ang suweldo.”

“Agwantaha lang una kana miyentras tanto.”

“Mao lagi. Pero mangita ko’g laing trabaho nga arang-arang ang suweldo. Kana bang makabuhi na’g pamilya.”

Nahilom si Annie. Mikaon siya og ice cream nga maoy silbing sera-gana sa ilang pagpangaon.

“Kun nakapasar pa unta ko sa teacher’s board,” ni Edelmar pa. “Dili unta ko mag-antos sa trabaho isip diser.” --Sumpayan pa