Handumanan sa Pista

Giparada ni Andro ang iyang awto kilid sa North Bus Terminal nga nahimutang sa barangay Subangdaku, Mandaue. Gihuwat ni Andro ang iyang higala nga si Noel kay mouban kini kaniya nga mamiyesta sa Bogo.

Alegre kaayo sa Bogo, ilabi na nga nahimo na kining usa ka dakbayan, kay bisan og layo pa ang Mayo 27 nga maoy pangilin ni San Vicente de Ferrer, daghan na kaayo ang kalingawan nga makapalingaw.

Kaganina ra nga nakabantay si Andro sa usa ka babaye nga nagpaabut og kasakyan. Diha’y higayon nga misuway kini’g sakay sa usa ka bus nga paingon sa Hagnaya-San Remigio, apan wala makasakay kay nag-ilogay ang pasahero pagsakay.

Sa kakapoy tingali, milingkod ang maong babaye sa usa ka tindahan nga namaligya og makaon. Nadani si Andro pagduol sa babaye ug nagpasumangil siya nga mopalit og makaon.

“Nang, timplahi ra ko’g kape,” matud ni Andro ngadto sa tindera dayong punit usab niya sa usa ka putos nga puto-maya. Nahukman ni Andro nga pakigsultihan niya ang babaye.

“Mora’g kaganina ka ra nga nagpaabut og kasakyan Miss, asa diay unta ang imong biyahe,” ni Andro pa ngadto sa babaye.

Milingi ang babaye kang Andro. “Pauli lagi ko sa amo sa Maño, San Remigio kay managkut mi sa patron sa Bogo. Saaran man gud ni namo kada tuig,” tubag sa babaye.

“Kun mao kana, pareho diay ang atong rumbo kay adto usab ko sa Bogo paingon. Gihuwat ra nako ang akong amigo. Dungan na lang ta kay mora’g lisud karon ang sakay Miss,” gitanyagan ni Andro ang babaye.

Nagpaila si Andro sa babaye. “Salamat kaayo Andro ha pagtanyag nimo pagpasakay sa imong sakyanan, pero mauwaw ko uy. Ayaw na lang siguro,” mauwawon nga mibalibad ang babaye nga nagpaila nga si Tess.

Gipasabut ni Andro nga walay sakay ang luyo sa sakyanan kay ang iyang higala anha man mosakay sa atubangan. “Salamat ha, maayo diay hinoon nga wala ko mopugos og sakay adtong puno kaayo nga sakyanan,” ni Tess.

Taud-taud mitingog ang call alert sa cellphone ni Andro. Si Noel ang nanawag. “Bay, sori g’yud kaayo nga wala ko makatubag sa daghan nimong tawag. Hubog kaayo ko gabii, lain ang akong lawas. Dili na lang ko modayon og uban nimo sa Bogo bay.” -- Sumpayan