Bawion ko ang imong gugma

Sa paniid ra ba ni Annie, ingon sa wala pay plano si Edelmar nga magminyo. Gusto pa ni Edelmar nga makabaton og stable nga trabaho. Naglaom ang iyang hinigugma nga makapasar sa teacher’s board exam aron mahimo na gayod kining usa ka hingpit nga magtutudlo. Mao nga naglibog karon si Annie kun unsay iyang buhaton aron mohunong na gayod sa hingpit si Melvin sa pagsamok kaniya. Dili siya makahimo paglikay sa ulitawo sanglit nakatultol kini sa ilang pinuy-anan. Ang dako niyang kabalaka mao kun mag-abot sila si Edelmar ug Melvin sa ilang pinuy-anan. Unsaon na man lang? Unsa man kahay iyang buhaton? Wala gihapon makapasar si Edelmar sa ikaduha niining pagkuha sa pasulit sa teacher’s board. Labihan ang gibating kahisagmuyo ni Annie sa resulta sa pasulit. Naluoy na siya pag-ayo sa iyang hinigugma nga duha na ka higayon nga napakyas pagpasar sa board exam.

“Manarbaho na lang tingali ko, An,” ni Edelmar pa nga daw gibati og tumang kahisagmuyo.

“Unsa man sab ang trabaho nga gusto mong sudlan?” Sukit ni Annie.

“Bisan unsa. Bahala na’g ma-under employed ko. Ang importante mao nga may trabaho. Lisod kaayo rong panahona kun wa tay income.”

“Wa ka na ba diay plano nga mo-exam pag-usab?” “Tan-awon lang unya ni nako.”

Sa pagsabot ni Annie, ingon sa nawad-an na og paglaom si Edelmar nga mamahimong hingpit nga magtutudlo. Mao nga iya kining gialam-alaman. Iyang gidasig ang iyang hinigugma. -- Sumpayan pa