Kamatayon sa panumpa

Dihadiha gipadagan sa driver ang taxi nga gimaneho niini.

Pag-abot sa Plaza Independencia, nanaog si Xenia sa taxi. Misulod siya sa plasa. Milingkod sa usa ka lingkoranang semento ilawom sa punoan sa kahoy. Nakasukot siya sa iyang kaugalingon kun unsay sunod niyang buhaton.

Unya, takulahaw lang, misantop sa iyang hunahuna si Norman, ang polis nga nangulitawo kaniya. Nangita siya’g pay phone. Gitawagan niya ang presinto sa kapolisan nga gialagaran ni Norman.

Dihang may mitubang na sa telepono, iyang gisultihan ang nakatubag nga si SPO1 Abenales ang iyang tuyo.

Wala madugay, nabati na niya ang tingog ni Norman didto sa pikas tumoy sa linya sa telepono. Nakaila dayon si Norman sa iyang tingog.

Wala mag-usik og panahon si Xenia. Gisuginlan dayon niya si Norman mahitungod sa nahitabo kaniya, ang bahin kang Reno ug sa mga kauban niining tulisan nga mipatay niini. Gitug-anan usab niya si Norman nga dala niya ang brief case nga puno sa mga kuwartang tinulis sa Salandanan Robbery Group.

“Tabangi ko, Norman,” ni Xenia pa sa nagkurog nga tingog. “Nahadlok ko. Tingalig masundan ko sa mga tulisan nga buot mobawi sa kuwarta nga nia kanako. Tingalig ila kong patyon. -- Sumpayan pa