Ila lang bugalbugalan si Ingko Apyot sa higayon nga mahilabay kini sa tindahan ni Salud-Oking. Bako na intawon kaayo ang bayhon ni Ingko Apyot ug medyo hinay na ang iyang linihokan.
Ang iyang balay tua sa may tampi sa pangpang nga mora’g nagsandig sa karaang dakit. Ug matag higayon nga molugsong si Ingko Apyot aron mopalit og buwad o di tinabal aron maoy sud-anon niini, sugaton dayon siya nilang Ikot, Tonyo, Badoy ug Kolas nga maoy labing bugalbugalon sa mga istambay dinhi sa sityo Buling-Liog.
Kini sila si Tonyo mga sakop ni Darmo ang giilang labing maldito dinhi sa sityo Buling-Liog. Way makasukol kang Darmo kay segurado ka man gyung mabun-og o di ba masamdan kay dili kini magpanuko sa pagdunggab o pagtigbas kay putong kaayo’g utok kining tawhana.
Karon, ingon sa mihunong si Ingko Apyot sa pagbugalbugal nila ni Tonyo, mitan-aw sa mga bugoy. Apan nagpadayon gihapon pagbugal-bugal ang mga bugoy ngadtong Ingko Apyot. Matud pa nila, “Ingko Apyot sapyot og lubot! Ha, ha, ha, ha, ha, ha, ha!” mosuliyaw dayon sila’g pangatawa. Igo na lang sa pag-utong ang tiguwang sa mga pagbugalbugal ning mga bugoy dinhi sa sityo.
“Gabaan baya mo nako, tiguwang na gud ko, ug ako pa gyud ang inyong nakit-an, nga daghan man untang mga tiguwang dinhi sa sityo,” hinay ang tingog ni Ingko Apyot nga mora’g nanuyo na.
“Haaaaa, ha, ha, ha, aha, ganahan man gud mi nimo, Ingko, kay ikaw man kuno ang pinaka palikero nga ulitawo dinhi sa sityo Buling-Liog kaniadto. Ug karon, nga tiguwang ka na, unsa man, Ingko, mogahi pa ang imo ug mora na la’g bat nga mikupos, ha, ha, ha!” lanog ang tingog ni Tonyo nga ginuntan og suliyaw nga katawa sa iyang mga barkada.
Taudtaod miabot si Gumer. Kini si Gumer mao ang giilang bagsik didto sa atbang nga sityo -- ang sityo Hubaghubag. Gibadlong ni Gumer sila si Tonyo nga dili intawon bugalbugalan ang tiguwang kay makagaba, apan nasuko hinuon sila si Tonyo ug nahitabo ang rambol. Gitabangan nila si Gumer. Ug kay may dala mang hait nga plamingko si Gumer maong nasamdan ang mga kauban ni Tonyo ug nanagan sila palayo kang Gumer. Nagpasalamat si Ingko Apyot kang Gumer dayong biya ug lakaw.
“Boanga adtong mga tawhana, uy,” ni Gumer pa ngadtong Sida, ang anak dalaga nilang Oking. “Wala tingali sila mahibawo nga kana si Ingko Apyot anak ni anhing Bruno Kirat nga nadungog nga hilabihang mangtasa dinhi sa atong sityo kaniadto, sila si tatay ug nanay nako maoy nagsugilon nako ana...”
“Mao ba diay, Gumer,” ingon sa gibati og kahadlok si Sida. Basta gani bahin og ungo-ungo nga estorya mahadlok gyud siya. Wala na lang motingog si Sida.
Unya, mitupad si Gumer paglingkod kang Sida. Wala pa gani manginit ang sampot ni Gumer sa lingkoranang bangko, kalit lang miabot si Darmo nga nagdala’g pinuti ug way daghang sulti gitigbas si Gumer ug maayo gani kay nakalihay dayon kini ug miibot sa iyang plamingko.
Nagharong ang duruha ug si Sida nakasinggit sa kalisang. Dihang nagsugod na ang tinigbasay ug dinunggabay sa duha ka mga bagis dihay misinggit og pakitabang kaha aron santaon kining dugoon nga panag-engkuwentro ni Gumer ug Darmo. Gani, may samad na si Gummer sa bukton ug si Darmo usab may samad dapit sa iyang kilid. Apan kalit lang nagpatunga si Ingko Apyot ug gipugngan ang ilang mga bukton nga sa mga kamot dunay mga hait nga hinagiban. Gitursi ni Ingko Apyot ang ilang mga bukton ug nangatagak ang ilang mga hinagiban sa yuta.
“Ayaaayyyyyyyyy! na-nabaliiii ang akong bukton,” ingon sa hapit magkadungan sila si Gumer ug Darmo sa pagsiyagit sa kasakit nga ilang gibati sa pagtursi-lubag sa tiguwang sa ilang mga bukton. Ang mga silingang-lumolupyo nga nakasaksi nakadayeg sa tiguwang apan di gyud malalis ang pagduda nga si Ingko Apyot usa ka mangtas nga ungo.
Unya, pagka-gabii, nabati sa taga sityo Buling-Liog ang langgis kaayong tingog sa wakwak nga nagkanayon, “wakkkkk! wakkkkk! wakkkkk!” Ug dihang mitugpa kini maoy ilang nakita si Ingko Apyot nga naglakaw nga bako ug yuko na ang bayhon kinsa may dalang buyot ug misum-ok kini sa kasagingan -- didto sa naglawod nga kangitngit sa kagabhion. Apan sukad-masukad wala pa gyu’y gibalbal dinhi sa ilang sityo. (Katapusan)