Marinero

Gula 6

Human sa duha ka hugna sa kumbati sa kama nila ni Jessie ug Nympha, nakatulog sila sa grabeng kakapoy. Pagmata ni Nympha, alas singko na sa kaadlawon basi sa orasan nga diha sa bung-bong sa kabin.

Mihinay pagtimbakuwas si Nympha ug miadto sa banyo nga anaa ra sulod sa kabin. Naligo siya ug pagkahuman nag-ilis. Wala gihapon mahigmata si Jessie, wala gani kini’y sapot.

Daw gilainan si Nympha nga nagtan-aw sa hubo nga lawas ni Jessie diin nagluya si Junior sa kakapoy mao nga iya kining gitabonan sa habol. Apan nahigmata si Jessie dihang midapat ang habol sa iyang lawas.

“Uy, nagmata ka na diay Nym?” ni Jessie pa nga mipahiyom sa dalaga. Wala motingog si Nympha nga padayon nga misudlay sa basa pa niyang buhok. Mitindog si Jessie ug gipunit ang intercom.

Gitawag niini ang mess officer ug gipahibalo nga duha gihapon ka pagkaon ang dad-on sa iyang kabin.

Taud-taud, may nanuktok. Pag-abli ni Jessie gidawat niini ang pagkaon nga gihatud sa cook sa barko. Nagdali nga mikaon si Jessie kay duty na niya pagka alas sayes.

“Nym, pahuway lang dinhi sa kabin kay duty pa ko sa bridge, pero kun ganahan kang mosuroy, sirad-i lang,” matud ni Jessie sa dayon niining biya paingon sa iyang duty sa bridge.

Naghinuktok si Nympha sa nahitabo kanila ni Jessie. Tungod sa pagdinali-dali niya nga mosakay sa barko, nakaila niya si Jessie ug nakasakay tuod bisan og wala siya’y tiket apan nabugti ang iyang pagkababaye.

Nasayud siya sa batasan sa mga taga barko nga daghan g’yung babaye sa ilang kinabuhi. Basi sa panultihon, ang taga barko “bisan asa nga port, sa lainlaing babaye report.”

Giandam na lang ni Nympha ang iyang kaugalingon sa sunod nga panghitabo. Dihang midunggo na ang barko sa Manila, wala dayon manaug si Nympha. Gihuwat niya si Jessie nga mahuman sa iyang trabaho nga miabag pagpadunggo sa barko.

“Adto na ko Jess, sayud ko nga baliwala ra nimo ang nahitabo kanato kay ingon man g’yud niana ang batasan sa mga marinero,” ni Nympha pa nga mitutok kang Jessie. Wala g’yud dayon makatingog si Jessie pagtubag sa dalaga.

Gihatud niya sa ubos sa barko si Nympha ngadto na sa parking area sa mga taksi. Pagbalik ni Jessie sa barko, diha pa diay niya mahibaw-i nga wala gani diay siya makapangayo og contact number sa dalaga. (Taposon ugma)