Bawion ko ang imong gugma

Gula 37

“Husto ang imong gibuhat, Day. Ayaw gyud na siya paadtoa sa amo, ha. Di ko gustong mag-abot sila si Edelmar didto.”

Pagkahapon, didto si Annie sa sulod sa iyang kuwarto, nagpunay og pamati sa mga huni ug awit nga gipalanog sa kahanginan pinaagi sa FM station sa radyo. Mga gugmahanong awit ang kasagaran nga gitugtog.

Napugwat si Annie dihang nakadungog siya nga mora’g may nanuktok didto sa gawas sa pultahan. Gipalong niya ang radyo ug naniid. May nanuktok gayod. Midali siya paggawas sa iyang lawak aron ablihan ang pultahan. Nagtuo siya nga si Edelmar ang didto sa gawas.

Apan nakugang siya dihang gibuksan na niya ang pultahan. Dili si Edelmar ang lalaki nga nagbarog didto sa gawas sa pultahan kundili si Melvin.

“Maayong hapon, An,” nangatahoran ang ulitawo. “M-mahimo bang makadayon?”

Wala dayon makatingog si Annie.

Naglibog si Annie. May pagduhaduha nga mihawid sa iyang hunahuna. Pasudlon ba niya si Melvin? Nabalaka siya nga tingali og mahiabot usab si Edelmar. Unsa man kahay mahitabo kun mag-abot ang duha sa iyang gipuy-an?

Wala hinuon sila’y relasyon ni Melvin. Pero maglisod siya pagpasabot ni Edelmar sa matuod nga sugilanon kun mag-abot gayod sila si Melvin ilabi na nga wala tug-ani ang iyang hinigugma nga may laing lalaki nga nangulitawo kaniya samtang didto kini sa Leyte, ug ang maong lalaki mao si Melvin. -- Sumpayan pa