Bawion ko ang imong gugma - Gula 35

“Asa man ta ron?” ni Edelmar dihang didto na sila sa gawas sa kan-anan.

“Ikaw?” Gipahunat ni Annie ang hinigugma.

“Gusto kang manuroy?”

“Dili ko. Gikapoy ko.”

“Kun mao kana mamauli na hinuon ta.”

“Mas maayo pa tuod. Exam ra ba nimo ugma. Mas maayo gyud nga makapangandam ka pag-ayo.”

“Sige, ihatod ta ka sa inyo.”

Igo lang siyang gihatod ni Edelmar sa iyang pinuy-anan. Nanamilit dayon kini kaniya aron mopauli na. Nakasabot si Annie sa hinungdan mao nga wala niya pugngi ang hinigugma. Gusto niyang kapangandaman og maayo ni Edelmar ang pagkuha niini’g pasulit ugmang adlawa.

Dihang nakalakaw na si Edelmar, misulod si Annie sa iyang lawak. Nag-ilis siya og sapot nga pangbalay. Pagkahuman, mihigda siya sa lantay.

Pero dihay butang nga kalit lang mihasol sa iyang kaisipan. Misantop sa iyang hunahuna si Melvin. Nabalaka siya nga niining paghibalik ni Melvin sa Sugbo, magsamok na usab kini kaniya. Tingalig makahatag kini’g problema sa relasyon nila ni Edelmar.

Diha siya sa halawom nga pagpamalandong dihang mitingog ang message alert tone sa iyang cellphone. Iyang gisusi. Si Edelmar diay ang nag-text. Iyang gibasa. Usa ka graphics ang gipadala ni Edelmar. Ang graphics naghulagway sa lalaki ug babaye nga naghalok nga may caption: You and me in paradise. -- Sumpayan pa