Dili maluyat ang saging kun dili maahat pagkahinog

Unsa goy nasulod sa imong ulo Lisapera nga nagpakabuang ka man og pakasal ni Bartolo? ni Nanay pa Repsalyang nga nakadungog og tabi sa among silingan ning among barangay sa Tinubdan.

"Unsa may lawasnong kalipay nimo nga mapaabot nga masakiton man kanang lalakiha og sakit sa tisis?"

Sa sinugdan, gipasagdahan ko lang ang biyuda kong inahan sa pagpatuyang niya og yawit bahin kang Bartolo nga hilabihan intawon kaniwang.

"Bisan tuod og ingon niana ang panglawas ni Bartolo Nay Repsalyang ... mapugngan pay baha sa Mananga nga masanta ang among plano nga magpakasal kaming duha ning umaabot nga adlaw'ng Sabado!" hugot ako nga nangatarongan sa akong inahan.

Wa lang tuyoa, dihay akong nahinumdoman sa kaparaygon sa pulong ni Bartolo kanako nga nagkanayon:

"Nasayod ako mahal kong Lisapera, nganong nagdili kanako si Nanay nimo Repsalyang nga ikaw mamana kanako?" luhaan ang duha ka mata ni Bartolo.

"Iya na man lang god nga gitagna nang daan, nga gumikan sa kasapsing sa akong lawas, dili ko makaya ang pagtagbaw kanimo sa hingpit nga kalipay sa gabii unya human sa atong kasal.

Sa gabii human sa among kasal ingon ako sa gipangulbaan kun simbako matinuod ang gipanagna ni Nanay Repsalyang.

"Tulisuka ako Lisapera ... inig ka buntag, kun nasayop ba ako sa akong panagna!" dihay gihagawhaw ang akong inahan nga kami rang duha ang nakadungog.

"Dili ba luyat pa kana sa saging ang armas ni Bartolo?"

Igo ko lang gibawsan og pahiyom ang akong inahan, nga didto diay mohigda sa may pikas sibay aron paniiron kun nagbakak ba siya sa iyang gipanagna.

Ambot unsang pagkahitaboa, nahubsan man sa gas ang among lamparilya nga gisuga sulod sa sibay. Ngitngit na hinuon kaayo?

Taliwala sa nagbuy-od nga kahilom sa kagabhion, kalit lang milugapak ang sawog namong kawayan. Ug mipuli ang talagsaong inuyog.

Nanuktok sa pultahan si Nanay Repsalyang diin kini nagpahimangno ug nagkanayon:

"Sipyat diay Lisapera ang akong gipanagna ... kay dili maluyat ang saging ni Bartolo ... kon dili maahat pagkahinog!"

Gibawsan ko lang ang akong inahan sa way hunong kong inutnga ug daghong sa kakutas. (Kataposan)