Kamatayon sa panumpa

“Kuyawa nako kaganina, uy,” ni Xenia pa. “Abi ko’g masakpan na ta sa mga tawong buot mopatay nimo.”

“Wa pa gyud itugot sa kahigayonan nga mahulog ta sa ilang mga kamot,” maoy pamahayag ni Reno.

“Nganong di ka man mosumbong sa kapolisan aron madakpan kanang mga tawhana. Total, mga gukdonon man sila sa balaod.”

“Wa koy salig sa kapolisan. Adunay mga opisyal sa PNP nga nakigkunsabo sa Salandanan Robbery Group.”

“U-unsa?” “Mao kana, Xenia. Daghang scalawag sa PNP karon nga nakigkunsabo sa mga daotang elemento.”

“U-unya, di kaha ta matultolan dinhi sa mga tawong nangita nimo?” “Dili ta makaseguro. Nagtuo kong siksikon gyud nila ang tanang lugar nga ilang gituohan nga posibleng atong dangpan. Maong dili lang gyud ta mokompiyansa. Nakaseguro kong dili ko nila lung-an paggukod hangtod nga ila kong mapatay ug makuha nila ang kuwarta gikan nako.”

Nakignat si Xenia pagkadungog niya nga militok si Reno sa pulong “kuwarta.” Gusto siyang magtuki mahitungod niini.

“U-unsay kuwarta?” Usisa ni Xenia. -- Sumpayan pa