Markado nga sakyanan

Kompiyansado ug masaligon si Ritche Tibon nga nagmaneho karong sayong kahaponon sa sakyanan nga pick-up nga bag-o lang niyang napalit. Dili siya mogamit og sakyanan sobra sa kaduha sa iyang pagpanulis og mga pawnshop. Aron dili mamarkado ang sakyanan, kaduha ra gyud niya gamita. Unya iyang ibaligya dayon.

Mga second hand o slightly used lang sab iyang pamaliton. Kining iyang gimaneho karon Isuzu pick-up nga pula, double cab, Model 2002. Running condition pa. Way garas ug lumping. Presentable pa ang porma. Kauban niya karon iyang suod nga higala ug pangabaga niya sa pagpanulis nga si Roy Zapanta. Tupad niya sa front seat. Nagsubay siya karon sa dalan Hernani Cortes sa baryo Panagdait. Padulong na sab sila sa laing pawnshop nga ilang giplanohang tulison. Usa ka bulan nila ning gitun-an ang kalihokan sa maong ahensiya. Karon, segurado sila nga molampos na sab sila sa ilang pagpanulis.

Silingan, kababata ug suod nga managhigala si Ritche ug Roy. Katalirungan sila ug parehong nagdungan og eskuyla. Mga kabus ilang mga ginikanan. Maong nahisalaag sila sa hiwi nga dalan. Dili man unta babag ang kakabos aron magmatarung. Apan ang bisyo ug daling kuwarta mao gyu’y naglunod nila sa kadautan. Sa pagsugod nilag tungha sa elementarya, mga hait silag salabutan. Dagko silag kuha sa mga periodical test. Apan dali ra silang gipul-an sa pag-eskuyla. Grade five pa lang sila, niundang na. Kay nila pa, way nadatu sa eskuyla.

Barkada silang duha bisag asa. Nagpapalit silag gamit sa limpia botas sa ilang ginikanan. Kay manglimpia nalang sila. Unya ilang kita sa panglimpia igo ra sa sugal. Hantak, kabit, tong-its, tsikitsa, piyat-piyat. Hangtod nagkadako ilang kuwartang gikinahanglan kay nientra naman sila’g inom, drugas ug pamabaye. Nakat-on na sila’g pang-isnats, pangawat, pangoot ug pangilad. Dihang nakakuyog sila’g grupo sa tulisan nga nilampos sa pagpanulis, nakat-on dayon sila. Nibuwag sila sa grupo ug sila ra gyung duha si Ritche ug Roy ang miyembro sa ilang gang.

Ubay ubay na silag natulis. Kada bulan duna gyud silay tulison nga pawnshop. Aron di sila dali sakpan, lainlaing siyudad ilang tulisan. Nakatulis na sila sa siyudad sa Sugbo, Mandaue, Lapulapu, Danao, Toledo, Bogo, Naga ug Carcar. Tibatiba sila sa ilang natulis nga mga alahas ug kuwarta. Hinoon, mora sab silag Robinhood. Kay manghatag man sila’s ilang mga silingan kun dako silag magordo. Nakatabang sab sila’s ilang mga igsoon paggasto sa ilang pagtungha. Kun ilang mga ginikanan masakit, makapadala sila sa doctor, ospital ug makapalit og tambal. Maong di na sila moundang og panulis. Kana kun di sila madakpan.

Ang ilang puntariya karong hapon ang Maritrans Pawnshop. Mga usa ka kilometro na lang ilang gilay-on. Makita na ang eskina Tres Borces Street diin nahimutang ang maong ahensiya. Unya, dunay Checkpoint sa mga polis. Wa mahadlok si Ritche ug Roy kay para man lang na sa mga motorsiklo ang checkpoint. Ang mga four wheels di man pahunongon.

Nipahinay si Ritche pagduol sa checkpoint. Nangabli siya sa bintana. Mga desente man silag hitsura. Wa nitan-aw ang mga polis sa ilang mga nawong. Didto tan-aw sa plate number, bulok, lawas ug kaha sa sakyanan nila. Unya gipara sila sa mga polis. Nihulbot silag armas unya gitionan silang duha. Nagtinan-away ang duruha sa ilang kakulba. Gidali nilag kuha ilang mga armas sa hawak ug gibutang ilawom sa lingkuranan. Nag-isa sila’s ilang mga kamot nga nanaug sa sakyanan.

"Kining inyong sakyanan gialarma ni sa LTO ug sa mga kapolisan. Gigamit ni’g panulis sa Green Meadow Commercial Bank, Royal Charm Pawnshop ug Arabian National Bank. Arestado mo!" matud sa team leader sa mga polis nga si SPO3 Maglinti. Gipusasan dayon sila sa duha ka kaubang polis. "Bangas ka! Markado naman diay ning sakyanana!" tuaw ni Ritche sa hilom. "Wa tawon mi kalibutan anang mga tulis, sir! Gahapon pa ni nako napalit sakyanana!" ni Ritche. "Tinood na sir" timang ni Roy. "Adto lang mo pangatarungan sa presinto. You have the right to a lawyer, to remain silent, anything you say may be used against you ..." dugang ni SPO3 Maglinti. Ug gipasakay silang duha sa patrol car sa polis nga nagparking sa tuong habig sa karsada. Gidrayban sa laing polis ang pick-up padulong sa presinto. Nisunod ang patrol car. (Kataposan) (Sa gusto’g libreng konsulta, dad-a ning pahina sa opisina sa tagsulat. Sa Sabado sa buntag)