Sugilanon Ang akong silingan

Kini ang kanunay kong himat-an kada kaadlawon, ang tagawtaw sa bagibian kong silingan nga si Maring. Halos buntag gyod ang tanan mahipugwat ko sa akong pagkatulog ingon man ang akong asawa nga si Rosing.

Walay kaikog kini si Maring sa iyang mga silingan nga nangatulog pa ning sayong takna sa kaadlawon. Ambot, mao na gyod tingali ni ang iyang batasan kay kada alas 4 sa kaadlawon magtagawtaw siya samtang magdigamo sa kusina.

Pun-an pa sa tuktogaok sa mga manok-hiniktan ni Okloy nga anaa ilansad sa koral simpig sa balay, dili na gyod ako mahibalik sa pagkatulog.

Morag magduhawit ang tagawtaw ni Maring ug ang tuktogaok sa mga manok ni Okloy. Unya, ako nalang ablihan ang transistor radyo ug maminaw sa buntagong balita.

Bisag unsa lang ang ipangyawyaw ni Maring sa iyang mga sakop sa balay ilabi na og dili mobangon og sayo. "Henyo, pagsag-ob didto’g tubig, ilabay unya ang basura kay nanimaho na tang baklag."

Makalagot lagi. Nganong dili man lang hinayon sa pagsulti aron di makatugaw sa mga silingan nga nangatulog pa? Ug dili lang kay kami ra lakip na ang uban namong mga silingan ang naglagot, apan nisabot na lang sa iyang kinaiya.

Sayong mangusina si Maring aron pag-andam sa balon ni Emily kay nagtrabaho man kini sa EPZA ug sayo kining mosulod sa trabaho, ug si Henyo usab nag-eskuyla didto sa siyudad. Kini si Henyo mao gayo’y yawyawan ni Maring kay dili motabang sa gimbuhaton sa balay ug atua lang kanunay sa bilyaran ni Yul inig-uli niini gikan sa eskuylahan. Ug dili lang si Henyo ang yawyawan ilakip pa gyod niya si Pabling nga iyang bana nga halos dili na gani makalihok tungod sa gihambin nga balatian. "Iduso nang sugnod, Pabling, putlan ta unya ka’s imong tudlo."

Salbahis lagi kaayog sinultihan. Inay masuko ka, usahay mahikatawa ka nalang hinuon. Si Pabling intawon nga ander de bonal sa bakya sa iyang asawa, dili lang motingog ug mogawas sa balay nga magtakihod ang mga lakang tungod sa balatian ug sa panuigon nga gilukdo. Dili niya tubayan si Maring kay gubot na kun iya pang paundayonan.

"Kun ako pa nang asawa, dila ra ang way labod niana," mitakilid ko ug mitanday sa akong asawa.

"Abi nimo, Seloy, daog man god kaayo si Pabling ni Maring. Dili sama nimo nga babayen-on kaayo," ug nahilom sila.

Mao ni ang taras ni Maring, sobra ka bagibian ug himalikas pa gyod kaayo. Si Pabling, pensyonado baya og P4,000 kada bulan sa SSS. Apan mapuno sa balikas ni Maring.Karon si Pabling, anaa, dili na intawon makalakang maglisod na pagbikang sa iyang mga tiil tungod sa reyuma ug sa pagpanakit sa iyang hawak.

Hinuon, gialimahan siya ni Maring. Giatiman ang pagkaon, ang pagkaligo ingon man sa pagpainom sa tambal nga gitomar niini. Kining tanan gibuhat ni Maring bisan pa man sa iyang pagka bagibian. (Katapusan)