Kamatayon sa Panumpa - Gula 68

“Xenia, a-ayaw bulingi ang imong mga kamot sa dugo sa sama nako nga usa ka tawong daotan. Mapatay mo man ako, dili na ikabalik ang kinabuhi sa imong inahan. Gawas pa, kun mapatay man ko nimo, nakaseguro kong dili ka magmalipayon. Hinuon, mahimo kang kriminal.”

Wala motingog si Xenia. Apan gitionan gihapon niya si Reno sa pistola nga iyang gigunitan.

“Giangkon ko nga usa ako ka tawong daotan,” ni Reno pa. “Apan gusto na kong mabag-o sa akong kinabuhi. Ug gusto kong tabangan ko nimo nga magbag-o sa hingpit. “Please, Xenia, hatagi ko’g higayon nga magbag-o.”

Naghinuktok sa makadiyot si Xenia. Unya inanay niyang gipaubos ang armas nga iyang gigunitan. Hangtod nga milugak ang iyang paggunit niini ug nahulog ang armas sa salog. Si Reno ingon sa nahuwasan sa hilanat.

“Salamat, Xenia,” ni Reno pa. “Salamat.”

Ug gigakos ni Reno si Xenia.

Mibalos paggakos si Xenia kang Reno. Wala siya makasabot sa iyang kaugalingon. Ingon sa kalit lang siyang mibatig kaluoy ngadto kang Reno.

Ngano man tuod nga dili man niya hatagan og higayon si Reno nga magbag-o sa kinabuhi niini gikan sa pagkadaotan ngadto sa pagkamatarong? -- Sumpayan pa