Gisalikway si Botsoy sa iyang pamilya

"Flor, manglayas ug manibat unya ta dinhi sa atong dapit inigkaretiro na nako sa serbisyo sa munisipyo. Pipila nalang ka bulan gikan karon moretiro nako kay motangkod na kong sayenta anyos," sulti pa ni Botsoy kang Flor usa ka hapon niana samtang nagmirinda silang duha sa abotanan nilang tindahan sa ilang dapit.

"Unya, unsaon man nato sa pagtuman niana nga may asawa ka man nga si Loling uban sa duha ka buok ninyong anak?" pangutana ni Flor samtang nag-inom sa kinaham niyang juice.

"Walay problema kana, money talks. Inigka-retiro nako sa serbisyo sekretohon nakog kobra ang akong mga benepisyo kun mga retirement benefits. Dili makahibalo niini ang akong asawa kay gamay ra siya og grado," pasabot pa ni Botsoy ngadto sa iyang kirida.

May asawa si Botsoy ug duha tuod ka buok ang ilang anak. Si Loling nga iyang asawa inato lang ang trabaho isip abag sa ilang pamilya ni Botsoy. Nananom siya og mga utanon sa gamay nilang luna lakip na ang mga lagutmon sama sa kamote ug balanghoy.

Namuhi usab siya og mga manok ug may gibatnan pa siyang baboy'ng anay sa iyang kumare nga si Binay.

Gumikan niini, nalimot nalang si Loling sa pagpanghindik ug pagpangareglar sa ilang lawas sa kasako lagi sa trabaho.

Mao ning nawala na ang gana ni Botsoy sa iyang asawa ug nakabig ang iyang pagtagad ngadto kang Flor nga bag-ohay pa lang pod nga nagkabulag sa iyang bana nga si Teryo.

Pilay estorya, miretiro na gyod si Botsoy sa serbisyo. Pagkatapos niyag kobra sa iyang benepisyo gikan sa GSIS ug sa Pag-ibig, nanglayas silang duha si Flor paingon sa siyudad.

Gikan sa siyudad, nanakay sila og bapor padulong sa Davao. Sa pagkahibalo ni Loling ning tanan, mora siyag naigo sa liti sa udtong tutok apan wala siyay nahimo gawas sa pagpatulo sa iyang mga luha ug mihangad siya sa Kahitas-an uban sa pangaliya nga silotan unta ang iyang bana sa kaulahian sa iyang paglimbong ug pagbudhi ngadto kaniya.

Milabay ang mga katuigan, dagko na ang ilang duha ka buok mga anak nga sila si Naldo ug Rosa. Wala damha, nabalitaan na lang nilang inahan ug mga anak nga si Botsoy gibiyaan ni Flor human sa pagkahurot sa kwarta sa naulahi ug mikuyog na usab sa usa ka langyaw kon foreigner padulong sa Manila.

Igo lang nga gihukhokan si Botsoy. Alaot si Botsoy kay human sa pagbiya kaniya ni Flor nasakit siya gumikan sa hilabihang konsumisyon sa daotang kapalaran nga mihapak ug milatos kaniya.

Wala madugay, namatay si Botsoy didto sa Davao ug gipahiluna ang patay'ng lawas niya sa gobyerno pinaagi sa usa ka 'pauper's burial'.

Namatay siya nga wala na gyod niya igkakita ang iyang pamilya. Gisalikway siya sa iyang pamilya gumikan sa pagbiya niya kanila ug ang nakaparat sa tanan mao nga ang iya rang babaye nga si Flor ang nakapahimulos sa iyang retirement benefits.

Bisan usa ka diyot wala gyod makatilaw niini ang iyang pamilya. Gikastigo ug gisilotan si Botsoy sa kaulahian sa Diyos! (Kataposan)