Si Tiyo Imok

Istoryador nga pagkatawo si Tiyo Imok. Iyang utok ug mga kamot kugihan kaayong nagdukiduki. Pobre iyang pamilya paglalin nila dinha sa Spolarium St., Duljo, Fatima ning dakbayan. Apan pagpanglabay sa mga katuigan, nagkaanam kahayahay ang ilang kahimtang gumikan sa diniyos niyang paningkamot.

Bulawan ang iyang mga pulong kang kansang gilaw nakahatag og kahayag sa iyang mga anak, labi na gayod ngadto ni Nang Lucia (Lucy), iyang eldest, kinsa misulay sa pagpanindag ginagmay sa Carbon. Sa sinugdanan, mga utanon lang.Hangtod mitubo, nahimong simpleng kan-anan. Unya ang maong kan-anan midako ug nanaghan. Nakapaadunahan sa kinamagulangang anak ni Tiyo Imok ug nakadugang og igong puhunan sa pagpangamiga’g datong negosyante ug mga banggiitang politiko.

Si Tiyo Imok, may dugong usa ka panday. Naghimo siyag daghang lantay para baligyaanan. Nagbuhat og mga kariton nga kasakyan sa mga bug-at nga kargamento, diin iya kining gipaabangan sa kinsay gustong mogamit niini. Kun wa ako masayop, si Tiyo Imok dunay 40 ngadto sa 60 ka tindahang lantay ug kariton nga gipaabangan matag adlaw dinha sa Carbon ug Taboan. Ginagmayay lang tuod ang kita sa matag usa, pero kun tiponon .... aw, dako na! Igo gyong makabuhig dakong pamilya.

Ang balay ni Tiyo Imok diha sa Dulho gamay lang gihapon. Ang kadato wala maiya. Atua mahipunta sa negosyante niyang mga anak, kinsa nagmahal kaniya sa hingpit. Usa ka tuig nga na-bed ridden si Tiyo Imok nga kinasingkasing gyong gisilbehan sa iyang mga minahal. 40 anyos na kapin sila sa Duljo. Daghan na siyag mga apo ug apo sa iyang mga anak. Usa ako sa mihatod niya ngadto sa iyang permanenteng pahulayan didto sa Calamba, diin nagpanon pagduyog ang mga nagmahal kaniya. Iyang edad, 87. Pinagga siya sa taga Duljo. Kay usa man siya sa mga kinaunahang namuhig mga kabayo sa ilang dapit. Nangutsero sab siya. Busa ilado ug nahimong tinahod halos sa tanan, maestambay man o desente nga tawo.

Wala na si Tiyo Imok. Taudtaod nang mitipon sa yuta. Pero ang mga karomata ug tindahang lantay nga iyang gipaabangan anaa pa. Nagtubod lang gihapon ang kita. Nagpadayon pagtabang sa mga pinangga nga iyang gitalikdan.

Ning umaabot nga Semana Santa, segurado gayod nga magkatapok na sab ang mga kadugo ni Tiyo Imok, gikan sa iyang mga sungkod hangtod na sa iyang mga anak aron sa makausa pa mangaliyupo atubangan sa atong Ginoong Jesukristo nga gilansang sa Krus, nga unta dad-on na uban kaniya ang kalag ni Tiyo Imok sa Langit kun ugaling anaa pa kini sa Purgatoryo hangtod karon.

Padamgohon man god usahay sila ni Tiyo Imok nga naglangoy pa kini sa dakong lawod ug nagpanawag og panabang, diin matud pa sa mga kakaraanan, gustong magpatabang sa mga buhi ang kalag sa namatay pinaagi sa pagpamisa. Dili kay ang pagpamisa lang ang ilang gihimo. Ning umaabot Biyernes Santo, sila misaad nga magpausa alang sa kaluwasan sa kalag ni Tiyo Imok.

Inig ka Ash Wednesday, magpabadlis silang tanan sa agtang. “Promise!” Matud pa sa usa kanila nga gikahinabi ning tagsulat. (Kataposan)