Kamatayon sa Panumpa

Gula 64

Niining tungora, naablihan na ni Xenia ang pultahan sa kusina. Midali pag-agpas si Reno kaniya.

“Pagdali,” giapura si Xenia ni Reno diha nay mga tunob nga ilang nabati nga nagpaingon sa ilang nahimutangan sa kusina.

Midali paggawas si Xenia sa pultahan. Sa wala pa mosunod si Reno kaniya, gipusil una niini ang lalaking armado nga mao pay paghimuntog sa kusina. Dihang nahagba na ang lalaki sa salog nga naigo sa pagpusil ni Reno, migawas na kini sa pultahan sa kusina ug miagpas kang Xenia.

Tulin silang nagdagan subay sa gamay’ng dalan-dalan nga mitadlas sa balisbisan sa kabalayan. May mga kaaway nga migukod kanila. Gipusil sila sa mga kaaway. Mibalos sab sa pagpabuto si Reno samtang padayon nga nagdagan sila si Xenia.

Nagliko-liko sila sa lainlaing dalan-dalan aron malipat ang mga kaaway. Dihang misangko na sila sa dakong karsada, mipara sila’g taxi.

“Diretso lang, Bay,” giingnan ni Reno ang driver sa taxi dihang nakasakay na sila si Xenia.

Gipadagan dayon sa driver ang taxi nga gimaneho niini.

Sa usa ka hotel sa downtown mi-check in sila si Reno ug Xenia. Samtang didto na sila sulod sa mabugnaw’ng lawak, walay tingog-tingog si Xenia. Ingon sa dili siya makatuo sa kapaspas sa mga panghitabo sa iyang kinabuhi niadtong adlawa. Naghinuktok siya samtang naglingkod sa ngilit sa kama. Gitalikdan niya si Reno. -- Sumpayan pa