Paligas sa trabaho

Unsa may ikatambag nimo nako Attorney? Dawaton ko ning tanyag nga katunga sa akong claim?” ni Antero ngadto sa iyang abogado nga si Atty. Arturo Panga. Nia sila ning sayong kahaponon sulod sa conference room sa Labor Arbiter. Nia sab si Atty. Glen Maningo, abogado sa Green Meadow Restobar ang gialagaran ni Antero isip kusinero sulod sa sobra bayente ka tuig.

Nipasaka og labor case si Antero batok sa iyang gialagaran nga restawran kay gisuspenso siya’g balig usa ka bulan. Gipasaligan siyang Atty. Panga nga labanan siya sa kaso nga illegal suspension batok sa restawran.

Unang nataktak sa trabaho ilang supervisor kay bag-o lang nakig-away sa tag-iya sa restawran. Gipaligas lang aron dili mabayran og entero sa ilang pabawon o separation pay. Nahulog lang sa nailad ang supervisor kay nipirma og voluntary resignation. Wa gyud hinuoy nadawat bisa’g peso. Si Antero wa nagpatonto kay nangunsulta dayon og abogado.

Gisaysay niya sa abogado ang nahitabo niya. “Ayoha nang pangluto nimo Tero kay dili bastabasta ang atong mga customer karon!” banghag mando ni Novie ang napuli nga supervisor. Nisurok ang dugo ni Antero samtang nangluto sa mga putaheng gi-order sa mga customer. “Unsay buot nimo ipasabot? Sulod sa bayente anyos nakong pangluto, wa ko magtarong sa akong pangluto? Bisa’g kinsa pay customer. Ma-pobre ka’g ma-datu, wa ko magyagayaga sa akong pangluto!” Maguwang sa singka ang tunada ni Antero. Nainsultohan siya pag-ayo nga sulod sa gidugayon sa iyang tarong nga serbisyo, karon lang siya mandoig ingon niana. “Kay nag-unsa man diay ko sa una?” tuaw niya sa hilom. “Ah insubordination ka! Ipasuspenso tikas manedyer!” banghag ni Novie. Pagkataudtaod, nakadawat dayon og suwat si Antero gikan sa manedyer nga gisuspenso siya’g usa ka bulan tungod sa insubordination.

“Illegal ang gibuhat sa manedyer. Kay gisuspenso dayon ka bisa’g way imbestigasyon. Wa ka hatagi’g suwat sa reklamo batok nimo.Wa ka hatagi’g panahon sa pagrason sa imong nasulti o nabuhat. Wa ka hatagi’g kopya sa hukom sa management human sa makuti nga imbestigasyon. Gipaligas lang ka, aron masuko ka. Unya insubordination dayon. Sumala sa akong pakisusi, mao say gibuhat nila sa ubang mga empleyado nga sobra bayente anyos nas serbisyo. Ilang gipaligas. Aron malibre ang separation pay. O kaha magamay pinaagi sa areglo ni Atty. Panga sa pagpreparar niya sa labor complaint ni Antero sa iyang bupete. “Di na ko mobalik og trabaho, Attorney. Mangayo na lang ko’g separation pay. Kay ang management ra goy hinungdan nga madaut among relasyon,” dugang ni Antero.

“Kay P100,000 may imong claim, naa ra nimo’g modawat ka’g katunga. Angay nimong hunahunaon nga kun dili ka modawat, mopadayon ang kaso. Madugay’ng mahuman ang pagbista. Madugay ang paghukom. Unya wa pa tay seguro modaug. Kun kita’y modaug, moapelar ang management. Malangan ang kaso gikan sa napulo ngadto sa kinse ka tuig. Kun moinsister kas P100,000 nga dugay nimong madawat, inig abot sa panahon, mogamay lang gihapon ang kantidad ana. Kay mag-umento man ang bili sa mga palaliton. Kun dawaton nimo ang katunga karon, segurado na nga kuwarta na gyud. Ug wa ka nay dugang gasto sa ngadto nganhi sa husgado. Segurado na kang nidaug. Mao nay giingon win-win solution. Hunahunaa pag-ayo” ni Atty. Panga. Niyangoyango si Atty. Maningo ug iyang kliyente nga si Novie Ramos, bag-ong supervisor ug representante sa Green Meadow Restobar. “Salamat panyero. Bilib ko nimo. Maayo kang mopasabot sa imong kliyente,” ni Atty. Maningo. Nagpahiyom.

“Sige dawaton nako,” ni Antero. “Very good” ni Atty. Panga. “Okey panyero, dokdoka dayon ang Compromise Agreement ug Quitclaim” dugang ni Atty. Panga ngadto ni Atty. Maningo “Very well, panyero,” ni Atty. Maningo nga nitindog. Ug niduol sa clerk nga nagmakinilya og computer sulod sa conference room. Nihangyo siya nga mobanos una sa computer aron mahuman ang areglo ug makauli ang mga abogado sa ilang tagsatagsa ka opisina. (Kataposan) (Sa gusto’g libreng konsulta, dad-a ning pahina sa opisina sa tagsulat. I-atol og Sabado sa buntag)