Bawion ko ang imong gugma

Sa tinan-awan pa lang ni Melvin nakasabot na si Annie nga nadani kini kaniya bisan sa una pa lang nilang panagkita. Dili siya gustong mahimo niyang problema ang maong lalaki mao nga milikay siya niini. Wala na siya moadto sa gipuy-an ni Lea sa Guadalupe. Apan usa niana ka gabii, nakugang siya sa paghibutho ni Melvin sa ilang pinuy-anan. Nakalitan siya pag-ayo. Wala niya damha ang pag-abot sa ulitawo.

Kay diha na man gayod si Melvin sa ilang pinuy-anan iya lang kining giatubang, ilabi na nga nananghid kini’g tinarong sa iyang mga ginikanan nga makigsulti kaniya ang ulitawo. Iya na lang girespetaran ang ulitawo.

“Giunsa man nimo pagtultol ang among gipuy-an?” Nakapangutana si Annie.

“Nangayo ko’g sketch ni Agaw Lea,” tubag sa lalaki. “Unya pag-abot nako diha sa may eskina, nagpangutana ko kun hain ang inyo.”

“Ikaw nay maantigong mosabot kun nganong ingon ra niini ka gamay ang among gipuy-an,” ni Annie pa. “Kabos lang kami.”

“Okey lang,” sa ulitawo. “Maayo na lang kini kay sa wala gyu’y kapuy-an. Balay man gihapon kini.”

Dili gusto si Annie nga makigsulti og dugay kang Melvin mao nga iya na kining gisukit kun unsay tuyo niini kaniya. Apan wala siya magdahom nga ang pagpangutana bahin sa tuyo niini maoy mahimong taytayan aron makapadayag kini og gugma ngadto kaniya. “I love you, An,” ni Melvin pa.

“Gikasubo ko, Melvin,” miprangka dayon si Annie. “Di ko gustong maglaom ka sa wala. Mao nga karon pa lang sultihan ko na ikaw nga dili ko makahimo sa pagdawat sa imong gugma.” -- Sumpayan pa