Kamatayon sa panumpa

Wala makapugong si Xenia nga mobati’g kalagot sa mga tulisan nga nakapatay kang Gordon. Alang niya, salbahis gyud ang mga tulisan. Nahinumdom siya nga mga tulisan usab ang nakaingon sa kamatayon sa iyang inahan. Naigo kini sa saag nga bala dihang nakigpinusilay ang mga tulisan sa kapolisan nga buot mosikop kanila human sa ilang pagpanulis sa usa ka pawnshop didto sa Carbon area.

Maong nasilag si Xenia sa mga tulisan. Gusto niyang mapuo ang maong matang sa mga sagbot sa katilingban.

Usa ka gabii niana, human sa ikalimang kanta nga gi-perform ni Xenia ibabaw sa makeshift stage, mikanaog siya ug mipaingon sa lamesa nga giokupar ni Reno. Daan na silang nagsabot sa wala pa magsugod ang kalingawan sulod sa club nga i-table siya niini human sa iyang perform. Namatikdan ni Xenia nga mora’g nagmasulob-on si Reno. Ligdong kaayo ang nawong niini nga nakig-atubang kaniya. Usahay mohun-ag sab ang kabalisa sa panagway niini.

“May problema ka ba?” Nangusisa si Xenia.

“Oo,” laktod nga tubag ni Reno.

“U-unsa kana?”

“Nag-ungaw sa kakuyaw ang akong kinabuhi dinhi sa Cebu.”

“U-unsa?” -- Sumpayan pa