Pagtugot ni mama

Happy Mother's Day, Ma ni Shirley dungan ang pag-amin niya sa kamot ni Mama Anita niya. "Salamat anak" mapahiyomon si Anita nga nidawat sa usa ka kartong chocolate cake nga regalo sa kamanghurang anak. Niamin sab si Jake bana ni Shirley nga nagsabak nag lima ka buwan. Wa pay buwan silang nakasal. Niduaw gyud silang duha ni mama Anita nila nga nag-inusara nalang sa iyang balay kay dugay nang biyuda. Minyo na sab ug naglain nag puyo ang maguwang ni Shirley nga si Cylir. May pangayoong pabor si Shirley sa iyang mama. Naglingkod karong buntaga sa sopa sa ilang sala si Anita.

Retirada nga magtutudlo sa saring publiko si Anita. Nagsalig nalang sa pension ug mga pribilihiyo sa pagka-Senior Citizen. Maghataghatag sab hinoon iyang duha ka anak. Apan dili gyud kanunay kay may mga pamilya na man. Dunay katabang babaye si Anita nga sweldado sa iyang mga anak. Dili stay-in si Brenda nga moabot sa balay sayong buntag. Mopauli sa hapon.

"Ma, pangayoon nako imong pagtugot. Nga mobalhin kog laing tinuhoan. Magpabunyag ko sa Sabadista. Aron mag-usa nalang mi ni Jake" ni Shirley nga niagbay sa iyang mama. Nakapanghupaw si Anita. Nanglantaw sa halayo. Wa dayon nitingog. Nagpahiyom si Shirley nga nagtutok sa iyang mama. Si Jake daw gikulbaan nga naghuwat sa isulti sa iyang ugangan.

Binunyagan nga Katoliko si Shirley. Katoliko man iyang mga ginikanan. Gani iyang papa Dencio, sa buhi pa, aktibo sa simbahan. Lay minister to iyang papa. Ug niapil sa hapit tanang kalihokan sa simbahan sama sa Cursillo, Charismatic, Adorador, ug uban pa.

"Gaduda man gyud ko nga mobalhin kag tinuhoan inig kadaku nimo. Kay sukad sa gamay pa ka, mahadlok kag pari. Dili ka paduol sa pari. Mohilak ka ug magmanya kun duolon og pari. Labi nag hikapon sa pari. Busa nakaingon kos akong kaugalingon, nga ang imong subconscious mind, dili Katoliko," ni Mama Anita nila. Tua gihapon nagtan-aw sa layo. wa nilingi sa anak ug sa umagad. Nakapanglab-ok og laway si Shirley ug Jake.

"Unya niabot ang higayon nga nagkauyab mo ni Jake. Wa gani ko kahibawo nga Sabadista siya. Kay alang nako, di man importante ang relihiyon. Dili na maoy sukdanan sa tawo. Kun tawo kang moatubang nako, tawo sab kong makig-atubang nimo. Dili sa ngalan sa relihiyon" ni mama Anita nila. Nagpaminaw lang sila. Nasayod sila nga taas-taas gyud ang isulti ni Mama Anita nila. Wa lang una sila nisagbat.

"Diha lang ko masayod nga Sabadista si Jake dihang nahimong babag sa pamilya nila nga pakaslan ka. Kay ilang pamilya hugot nga Sabadista. Di sila gustong masagulan og laing relihiyon ilang pamilya. Apan ang gugma buta man lagi kaha. Wa kakita nga laing tinuhoan ang gihigugma. Tungod sa kaistrikta sa inahan ni Jake, nisibat si Jake. Nagpalayo. Di unta mangasawa nimo bisag namabdos na. Apan nasalbar imong dungog kay nipadala kog sulat sa mga ginikanan ni Jake. Giingnan nako sila nga isabwag nako ang inyong pagkonsinter sa inyong anak sa tanang Sabadistang simbahan. Nahadlok sila’g maulawan sa ila mismong simbahan. Busa nihukom nga mamalaye. Apan nasayod ko nga moabot ning higayona. Kay ang inahan ni Jake mohunghong man gyud sa anak. "Kinahanglang madala gyud nimo sa atong tinuhoan imong asawa. Sama sa pagdala nako sa imong papa" ni mama Anita nila.

"Edukado kong pagkatawo. Kun supakon tika Shirley, magpaila lang nga ignorante ko. Constitutional right sa usa ka tawo ang pagpili og relihiyon. Gimando sa batakang balaod nga katungod ug kagawasan sa tawo ang pagpapili kun unsay iyang gusto nga relihiyon. Busa, dili ko mosupak nga mag-Sabadista ka. Kung saan ka masaya, suportahan kita" ni Mama Anita nila. Nagpahiyom. "Salamat ma," ni Shirley. Nihawok sa aping sa inahan. "Happy Mother's day ma" subli ni Shirley. "Same to you, anak" ni Anita. Nihapuhap sa tiyan sa anak. "Di madugay, inahan ka na sab" dugang niya. "Salamat, ma" ni Jake. Niamin pag-usab. Niyango si Anita. Ug mapahiyomon siyang nagsud-ong nila nga nag-holding hands nga nanaug sa panimalay. (Kataposan) (Sa gusto’g libreng konsulta, dad-a ning pahina sa opisina sa tagsulatr. Sa Sabado sa buntag)