Ang crush kong lalaki

Mayo. Bulan sa pagpamulak. Bulan nga dunay daghang pista labi na gyod sa kabarangayan. Malipayon ko nga mikuyog sa akong klasmet nga si Nemia sa ilang lungsod. Kauban sab kami si Nemia sa gisak-an namong boarding house sa siyudad. Taga Ormoc ko apan wala ko mopauli karon nga bakasyon na, wala nay klase.

"Di kaha mabalaka ang imong mga ginikanan, Jean?"

"Gitawagan ko na sila sa selpon. Gitug-anan ko sila nga mamista una ko dinhi sa inyo sa San Isidro." Gikidhatan ko si Nemia. "Basig anhi ko makakita’g prince charming nako."

Nanuroy kami si Nemia sa plasa sa San Isidro niadtong tungora. Dasig ang palibot. Dunay mga kalingawan sa peryahan. May nagdulag basketball. Basta nalingaw gyod ko. Bisperas karon sa pista sa San Isidro.

"Ikaw man god."

"Kay ngano man diay?" Nakatutok ko sa akong klasmet.

"Pilian kaayo’g laki. Daghan na ang nangulitawo nimo, uy. Pero pulos mo sila gibalibaran."

Mikatawa ko. "Aw, abi ko’g unsa na. Well, wa koy nagustoan nila, uy. Di ko sila type. Bati silag mga nawong."

"Haayyy! Kahinawayon gyod nimo, Jean!"

Igo nalang kong mikatawag kusog.Unya mipadayon kami si Nemia sa pagpanuroy. Kalit kong nakahunong sa paglakaw. Nakatutok ko sa usa ka lalaki nga nagtindog sa usa ka bahin sa plasa ug nagkaon og ice cream. Morag nabatyagan nako nga nag-ulpot-ulpot sa pagpitik ang akong kasingkasing. Sa unang higayon, naibog ko’g lalaki. Guwapo kaayo siya, puti, husto sa gitas-on ug macho.

"Naunsa ka, Jean? Mihunong man god ka’g lakaw?"

Gikidhatan ko si Nemia. Dako kaayo ko’g ngisi. Gitudlo ko sa akong simod ang maong lalaki.

"Crush nako siya, Nemia."

"H-Ha?"

Nahimuot ko sa reaksiyon sa akong klasmet, nakugang siya. Apan wala ko kini hatagi og bili.

"Nakaila ka niya, Nemia?"

"Oo. Taga dinhi na siya. Ngano man?"

"Ipaila-ila ko niya, bi. First time pa nga nagka-crush ko’g laki. Sus, siya na ang akong gipangitang prince charming."

Kay wala man maggunok si Nemia, gikuptan ko siya sa kamot ug akong gibira paingon sa maong lalaki. Ug dihang nagtindog na kami sa atubangan sa lalaki, gikuhit ko ang akong klasmet.

"Sige na, Nemia. Ipaila na ko niya."

"Aw, mao man kaha."

Nagpa-cute ko nga nagtan-aw sa lalaki, mitan-aw sab siya nako. Anhi ko ra diay makita ang lalaki nga himuon kong inspirasyon sa akong kinabuhi.

"Jean, siya si James. Ug James, siya si Jean, akong klasmet sa college."

Puwerte kong lipaya dihang gipaila-ila na kami si James sa usa’g usa. Bagay kaayo ang iyang ngalan sa iyang kaguwapo. Dako kaayo’g ngisi si James. Nagtuo ko nga nakagusto sab siya nako. Guwapa ug seksi god ko.

"Ahhh! Ahhh!"

Nakapanguros ko. Namuwa ang akong nawong. Dili diay makasulti si James. Usa siya ka amang. Mikagikig katawa si Nemia. Sa akong paminaw, morag iya kong gibugal-bugalan. Ug morag nadungog ko gikan kaniya nga nag-ingon."Da, mao nay imong naani sa imong pagkapilian!"

Gibati ko kaayo ang kaulaw. Ug nianang pagka buntag, nanagkot ko sa kapilya sa San Isidro. Nananghid dayon ko kang Nemia nga mopauli na sa Ormoc. (Kataposan)