Ang mas dako nga hagit

CEBU, Philippines - Lumad nga mga taga Davao City ang kaliwat ni Sidruz. Gumikan sa dakong tinguha sa ulitawo nga makahaw-as sa kawad-on maingon man sa damgo niini nga makatiwas sa pagtuon nilalin siya dinhi sa dakbayan sa Sugbo ug nanrabaho isip security guard.

Giisip ni Sidruz nga ang kawad-on maoy usa ka dakong hagit nga angayan nga himoong gabayan sa paningkamot. Iya gayud nga gi-ayo og han-ay ang iyang schedule maingon man giayo usab niya pag-budget ang iyang suweldo isip sikyo aron makakuha og kurso nga commerce. Wala magdugay, paglabay sa pipila ka tuig natapos ra gayud niya ang iyang kuso. Nagbunga ra gayud ang paningkamot sa ulitawo.

Malipayon kaayo nga nibalita si Sidrux sa iyang higala nga si Bobby nga usa usab ka sikyo nga nakapasar siya sa job interview sa Orion Lending Investor ug gani pasugdon na siya sa pagtrabaho inig sunod semana niana. Nadawat siya isip usa ka collector sa maong lending firm.

"Dako na kaayo kining ka higayonan nimo Sidruz, naana na ka sa posisyon sa pagtabang sa imong mga igsuon ilabi na sa pagpaeskuyla nila didto sa Davao kay dakodako naman unya ang imong suweldo sa lending. Ayaw unya kalimot sa pagpamesa sa una nimong suweldo," nagkanayon ang higala nga si Bobby samtang nagpasinaw sa iyang service firearm.

Sa dihang nagsugod na og trabaho sa lending firm, dili gayud mosipyat si Sidruz pagpadala og kuwarta sa ilaha sa Davao matag adlaw nga suweldo bisan sa iyang nabalitaan nga wala magtarong ang iyang mga igsoon. Si Estrella sayo kaayo nagminyo sa uyab nga tricycle driver, si Joel wala moeskuyla, nagsige lang kini og bugoybugoy, si Dodong Aying ang ilang kamanghuran wala usab moeskuyla kay namaligya og sigarilyo sa bus terminal. Ang iya gayud nga gikaluy-an ang iyang inahan nga si Lorena kay bisan nagsige na kini og mulo sa sakit sa bukobuko nagpadayon gihapon og dawat og labada. Nakahibalo siya nga wala kini katimbang sa pagdala sa ilang pamilya kay ang amahan nga si Felipe usa ka iresponsable nga bana. Bisan walay klaro nga kita isip usa ka panday nagsige lang og sugal og tong its.

Wala una mag-apil-apil og uyab-uyab ang ulitawo nga si Sidruz, bisan sa mga anak ni Eba nga may pagtan-aw usab kaniya. Anaa ang iyang mga seksi usab nga mga office mates sama nila ni Terry, Jojo, Aileen ug Sarah. Gibuhos sa ulitawo ang iyang panahon sa trabaho. Tungod sa iyang maayong strategy sa collection nisaka pag-ayo ang income sa lending firm nga gialagaran. Paglabay sa tulo ka tuig, tungod sa maayong performance kusog kaayo ang promotion ni Sidruz gikan sa pagka loan collector, nahimong appraiser ug wala usab magdugay na-promote sa pagka cashier.

Usa ka adlaw niana, gikulbaan si Sidruz dihang gipatawag kini didto sa opisina sa ilang manedyer sa Orion Lending Investor nga si Mr. Lee Labatas.

"Mag-open og lain nga duha ka mga branch ang atong lending firm didto sa Mindanao area ug tungod sa maayo nimong gipakita nga performance, nakahukom ang board of directors nga ikaw maoy among napili nga modala sa ato unyang branch sa Davao. Congratulations!! I know you can make it," matud sa kalma ug mestisohon nga manedyer samtang nagtempla kini og imported nga kape.

Wala magdugay, lulan na sa barko padulong sa Davao aron magsugod na si Sidruz sa iyang bag-ong assignment. Giisip niya nga kining iyang bag-ong assignment isip usa ka branch manager nga usa na usab ka hagit sa iyang panarbaho.

Malipayon ang ulitawo kay mahiduol na gayud siya sa iyang pamilya sa Davao ug makabaton na siya og kahigayonan nga personal niya kini nga magiyahan para sa mga masanag nga ugma.

Para ni Sidruz kini ang mas dako nga hagit. Nagtuo siya sa inengles nga panultihon nga no amount of success in life can compensate for failure in the home. (Katapusan)