Si David ug si Batsheba

Daghang ang nahimong asawa ni David nga hari. Usa niini mao ang anak ni haring Saul sa dihang napatay niya si Goliat. Siya ang pinakamaayong hari sa Israel niadtong panahon. Apan may usa ka hitabo nga naka-mansa sa iyang pagkahari. Samtang nagpahayahay ug nagsuroysuroy si David sa atop (deck roof) sa iyang palasyo, nakita niya ang usa ka babaye nga naligo, hubo kini sa tanan. Matahom ang maong babaye nga nakadani ni David ang katahom niini.

Diha-diha nagsugo siya pagpangutana kun kinsa kining bayhana.

"Siya si Batsheba, mahal nga hari," matud sa sinugo "Asawa siya ni Uria nga usa sa mga kapitan sa imong kasundalohan nga atua karon sa panggubatan ug nakig-away sa atong mga kaaway."

"Di ba si Joab ang heneral nga atua didto?"

"Si Joab, mahal nga hari."

"Adtoa si Joab ug ihatag kining akong sulat," nagsulat dayon si David ug gihatag niya sa iyang sinaligan. Ang nakabutang sa sulat mao kini: Ibutang si Uria sa labing init nga away aron mapatay.

Busa, napatay si Uria ug gikuha ni David si Batsheba aron mahimong asawa. Apan wala kini ikahimuot sa Ginoo, nga nagsugo kang Nathan nga propeta aron pagpahimangno kang David. Matud ni Nathan, "Mabuhi ka, hari. May duha ka tawo nga ang usa pobre ug ang usa, dato kaayo. Kining pobre, may usa ka karnero nga iyang pinangga kaayo. Iyang idungan sa iyang pagkaon ug ipahimutang niya tupad sa iyang higdaanan.

"Kining dato, daghan kaayo siyang mga karnero og usa ka higayon nga may bisita siya, iyang gikuha ang nag-inusara nga karnero sa tawong kabus ug maoy giluto ug gipakaon sa iyang bisita. Unsay imong ikasulti niini, hari?"

"Magbayad ang tawong dato og pito ka kapitoan tungod sa iyang gibuhat sa usa ka tawong kabus."

"Ikaw ang maong tawo, hari! Kay sa kadaghan nimong mga asawa, imo pang gipapatay si Uria aron lang makuha ang nag-inusara nga asawa ni Uria nga si Batsheba!"

Wala makatingog si David nga hari ug hilabihan ang iyang pagbasul niini. Nagbangutan si David tungod sa iyang nabuhat nga kasal-anan. (Katapusan)