Kamatayon sa Panumpa

Gula 51

Apan nabalaka gihapon si Xenia nga tingalig mobalik pa gihapon si Mr. Waldon karon sa club. Unsaon niya paglikay niini nga “malakas” ra ba kini ngadto sa ilang manager?

Gikuligaw sa kahasol ang alimpatakan ni Xenia. Wala siya masayod kun unsay iyang buhaton aron makalikay siya kang Mr. Waldon.

Wala mahitungha si Mr. Waldon sa UCV’s Sky Is The Limit niadtong gabhiona. Nakapasalamat sa hilom si Xenia. Sa hilom nag-ampo siya nga maayo unta’g dili na gyud magpakita sa club si Mr. Waldon hangtod sa hangtod kay dili gyud siya buot nga makakita niini. Nasilag pag-ayo si Xenia kang Mr. Waldon human niini angkona ang iyang pagka babaye sa daotan nga paagi!

Pagkaugma, nagbansiwag ang balita sa lainlaing mga pamantalaan sa dakbayan sa Sugbo nga si Mr. Waldon nadakpan sa hiniusang operasyon sa PDEA, CIIB, CIDG ug PNP. Usa diay ka druglord si Mr. Waldon ug plantalya lang ang negosyo niini nga usa ka construction firm. Ang labing dako niining raket mao diay ang illegal activities.

Ingon sa naibtan og tunok si Xenia. Wala na siya’y problema kang Mr. Waldon kay naposasan na man kini sa mga awtoridad. Nanghinaot siyang dili na kini makagawas sa bilanggoan aron dili na gayod kini makamugna og kadaot sa iyang kinabuhi. -- Sumpayan pa