Nunot sa sonatang binayran

Mao palang gani ang paghitangka ni Edna diha sa ilang may pergola, human makakanaog sa habalhabal nga maoy iyang gisakyan gikan sa lungsod, gisugat dayon siya og pangutana sa iyang inahan nga si Inse Maria.

"Kumosta naman ang imong lakaw," sukot ni Inse Maria kang Edna sa dihang nagkasugat na silang duha.

"Wala gyuy ayo," ingon og walay kadasig nga mitubag si Edna. Nga hapit gani dili motan-aw sa iyang inahan. Ug sa iyang panagway mihulma pag-ayo ang dakong kasub-anan.

Pakyas man god siya sa iyang lakaw didto sa lungsod. Sa iyang pakigkita kang Mr. Kurakot, ang schools district supervisor. Sa tuyo unta nga dawaton na siya pagka magtutudlo sa tulonghaang elementarya.

"Unsay buot mong ipasabot? Wala lang gihapon ka dawata pagka magtutudlo, bisan kun pasado ka sa "Teachers Board?" Ug dili ba, ikatulo man gani ka sa "ranking"?" Nagpusotpusot ang mga pangutana ni Inse Maria ngadto sa anak.

"Unsaong nausab naman sab kuno ang "ranking", ug gihatagan og gibug-aton ang gitawag og "localization". Nga ang buot ipasabot mas molabaw ang usa ka aplikante nga nagpuyo gayud sa dapit diin mahimutang ang usa ka tulonghaan," pasabot ni Edna ngadto sa iyang inahan.

"Localization sa ilang kagaral? Dili ba duna may mga magtutudlo nga nagpuyo sa laing lungsod ug unya ania magtudlo sa ato?" Mitaas na gayud og samot ang tingog sa inahan ni Edna. Ug nagpangusmo pa gani kini sa tumang kalagot.

"Ayaw namo og tuo anang ubang mga ranking uy! Mahimo ra nang "wrongking", kun matabunan na og lingin. Suma, kadto si Mr. Bigay, dili ba nakapuwesto man dayon to bisan wala ipaagi og "ranking"?" Misagbat si Iyo Terio, ang amahan ni Edna nga diha ra usab sa duol.

"Unsa may buot mong ipasabot?" Si Iyo Terio na usab maoy gipuntariya sa pangutana ni Inse Maria.

"Karon gud nga panahona, kun gusto ka gayud nga makasud og trabaho, kinahanglan monunot ka sa tugtog sa sonata. Kay mao na kanay nauso," gipasabot ni Iyo Terio ang iyang asawa. "Mobigay ka gayud kun kinahanglanon,"dugang pa niini.

"Aw, kun mao diay na. Nganong dili man ta makigsayaw kanila nunot sa sonata,"nagkanayon si Inse Maria, human masabti ang gipamulong sa iyang bana.

"Hilom mo diha nay uy. Mabatian gani mo, unya madangat ni sa mga hingtungdan malintian gyud ta og samot," gibadlong ni Edna ang iyang mga ginikanan.

Ug tuod man mibalik si Edna sa pakigkita kang Mr. Kurakot. Apan ning higayona kuyog na niya ang iyang amahan. Hinuon didto nila pakigkitai si Mr. Kurakot sa balay niini.

Usa ka buntag niana nakadawat si Edna og suwat gikan kang Mr. Kurakot. Hilabihang lipaya niya kay ang unod sa suwat nagpahibawo man kang Edna, nga mahimo na siyang mo-report isip usa ka magtutudlo sa usa ka tulonghaang elementarya diha sa usa ka barangay nga duol ra usab sa ila.

Ug sa hilom, nakaingon si Edna nga maayo ra gyud nga misayaw siya nunot sa sonata. Hinuon, sa usa ka sonatang binayran. (Kataposan)