Kamatayon sa Panumpa

Gula 48

“Let’s go,” agda dayon ni Mr. Waldon kang Xenia.

“Okey,” sanong ni Xenia.

Nanggawas dayon sila sa restaurant. Milahos sila sa parking area diin nahimutang ang Toyota Hi-Lux nga sakyanan ni Mr. Waldon. Naabtan nila ang driver ni Mr. Waldon nga nagkalingaw og paminaw og music sa FR radio sulod sa luhong sakyanan.

Dihang nakasakay na sila si Xenia ug Mr. Waldon, gimandoan sa naulahi ang driver nga mamalik na sila sa UCV’s Sky Is The Limit. Dihadiha gipadagan sa driver ang sakyanan. Gisubay nila ang karsada paingon sa downtown. Bisan dili na huot ang dalan kay dili na man kaayo daghan ang mga sakyanan apan igo-igo ra ang gikusgon sa pagdagan sa ilang gisakyan.

Wala pa gani sila makaabot sa Fuente, nahibulong si Xenia kay daw kalit man lang namuypoy ang iyang lawas. Unya gibati niya ang pagduka. Ug nakatulog gayod siya pagkilab sa pipila ka daklit.

Sa iyang pagmata, diha na siya sulod sa usa ka mabugnaw’ng lawak. Nakugang siya sa dihang iyang nadiskobrehan ang iyang kaugalingon nga wala nay sapot. Apan ang nakapahugno kaniya mao ang iyang nakita nga naghigda sa iyang tupad ibabaw sa humok nga kama. Si Mr. Waldon! -- Sumpayan pa