Bawion ko ang imong gugma

Gula 8

“Nakakuha na ko’g ticket sa barko,” tug-an ni Edelmar. “Sa Sabado ang akong schedule sa paglarga.

“Mahinayon ka gyud diay,” walay kadasig ang tinubagan ni Annie.

“Oo. Di ba nagkasabot na man kita mahitungod niini?”

“Bitaw. Unsaon nga dili ka man magpapugong.”

Wala makatingog si Edelmar. Nahitutok kini kaniya. Milingiw siya sa tinan-awan sa ulitawo. Ang iyang kahiladman gisugkay sa kabalaka, kahasol ug kasubo nga magkalagyo na gyud sila si Edelmar.

Mipaduol pag-ayo si Edelmar sa gilingkoran ni Annie. Misikit ang ulitawo kaniya. Gikab-ot niini ang iyang tuong kamot ug gihimas-himas.

“Gipakaingon ko bag nagkasinabot na kita niining bahina,” daw may kahisagmuyo sa sinultihan ni Edelmar.

“Nagkasinabot na man bitaw ta,” ni Annie pa. “Pero di lang gyud nako kapugngan nga mobati’g kasubo ug kabalaka.”

“Unsa may imong kabalak-an? Bisan magkalagyo ta apan magpadayon ang atong gugma. Kun makatapos na unya ko sa akong pagtuon, mobalik dayon ko dinhi. Mobalik ko tungod sa atong gugma.”

“Unsa pa may akong mahimo nga mao na man kaha kanay imong hukom?”

“Di ko gusto’g ingon niana nga tinubagan, An. Ang gusto ko nga suportahan nimo ang akong desisyon. Kanang dili supak sa imong kabubut-on ang akong pagbiya dinhi sa ato. Aron ba dili sab ko mahasol kun atua na unya ko sa Leyte. -- Sumpayan pa