Ang bag-ong katabang nila ni Mr. Ledor

Kilumkilom na nga nahiabot si Mr. Ledor sa ilang puloy-anan, gikan sa munisipyo diin siya magtrabaho, isip usa ka "Municipal Assessor". Milumon man lang god siya sa usa sa iyang mga kumpare nga nagmotorsiklo, gikang nangumpra sa merkado sa lungsod. Ug mopauli na usab sa ila.

Nihit man god ang namasaherong mga habalhabal niadtong tungora, kay nagtutaligsik man. Nga igo gyud nga nakahumod sa magsakay og motorsiklo, nga dili maggamit og "rain coat".

Human makakawas sa motorsiklo ug makapasalamat sa iyang kumpare, milahos dayon si Mr. Ledor og sulod sa ilang balay. Ilabi na kay nag-anam naman og kakusog ang uwan. Apan sa dihang mosulod na unta siya sa ilang kuwarto, kalit lang siyang nahapaurong, kay mao may iyang naabtan ang usa ka batan-ong babaye, nga nagpahimutang sa ilang mga ilisan diha sa usa ka aparador.

Ug nakurat na lamang siya kay sa paglingi pa sa maong batan-on ngadto kaniya, iya man dayon kining nailhan. Si Darie man diay kini, ang usa sa mga silbedora, sa usa sa mga tindahan og ilimnon didto sa may North Bus Terminal.

"Nag-unsa ka dinhi?" Gisukot dayon ni Mr. Ledor ang batan-ong babaye, nga ginganlan og Darie. Ug dugay na niyang kaila. Kay usa kini sa mga tigsilbi, samtang mag-inom sila sa tindahan nga gialagaran niini. Kanunay man god nga mosulod si Mr. Ledor sa maong tindahan aron mag-inom og beer.

"Magpa-maid kaninyo," mubong tubag sa batan-ong babaye nga mihunong una’g kadiyot sa iyang gibuhat. Ug nakig-atubang kang Mr. Ledor.

"Unsa? Anhi ka sa amo, aron magpa-maid?" Morag nahasinta ang tingog ni Mr. Ledor. Wa man god siya magdahom nga mao kini ang buhaton sa babaye. Nga tinud-on diay niini ang gisulti ngadto kaniya, usa ka higayon niana samtang nagkasultihanay sila. "Ngano, dili ka diay mosugot nga magpa-maid ko dinhi sa inyo?" sa batan-on pa ngadto kang Mr. Ledor.

"Nabuang ka? Moipon kag puyo dinhi sa amo?" Simbako uroy og mahibaw-an ta sa akong asawa," ni Mr. Ledor pa usab, sa pinugngan nga tingog. Nahadlok man god siya nga mabatian sa iyang asawa. Isog ra ba kaayo kini. "Basta, mosugot kag sa dili, magpa-maid gyud ko dinhi sa inyo. Total nagkasabot naman kami og ang imong asawa.

Mapugsanon kaayo ang batan-on. Ug ang gusto gyud niya maoy matuman. Duna na man goy nahitabo kanila ni Mr. Ledor. Daw dili na gyud kini gusto pa nga mahimuwag sa lalake. Ug daw nagmarka bahala nalang kini.

Motingog pa unta si Mr. Ledor, apan sa pagkamatikod niini nga nagdangadanga na ang iyang asawa mihilom na lang kini. Apan morag nakutaw gayud ang utok niini. Tungod ning pagkahibutho karon diha sa ila sa batan-ong babaye ug gusto nga makigtipon kaniya.

"Mao ni siya si Darie, Ga. Ang bag-ong natong katabang." Gipaila kunohay sa asawa ni Mr. Ledor ang batan-ong babaye ngadto kaniya. Wala man god kini kalibutan nga daan nang kaila ni Mr. Ledor ang batan-ong babaye.

Wala gayud makaharong og tan-aw si Mr. Ledor kang Darie. Naglingiwlingiw lang gayud siya. Ug morag wa lang gani siya mamati pa sa ubang gipanulti sa iyang asawa. Nga may kalabutan sa pagdawat kang Darie isip ilang katabang.

Mao hinuoy mipasulabi sa iyang galamhan ang dakong kabalaka ning kalit nga paghibutho ni Darie diha sa ilang panimalay. Ug nagpasumangil pa nga moalagad isip ilang katabang.

Nahadlok man god si Mr. Ledor nga mahibaw-an unya sa iyang asawa nga duna diay silay tinaguang relasyon ug ang ilang bag-ong katabang. (Kataposan)