Mihilak ang pilya kong amiga

Sa tanan kong amiga, si Susie ang giila kong pilya. Naanad nako sa iyang kinaiya, usahay ikatawa ko nalang ang iyang pagka pilya. Kausa gani nadala ko sa iyang gisulti. Gisultihan ko niya nga nakagusto nako si Isagani, nga gikalipay ko kaayo.

"Tinuod ka, Susie?" Mora ko’g nagpautaw-utaw sa panganod niadtong tungora. Kinsay dili malipay? Maka-boyfriend na gyod ko.

"Tinuod lagi. Gusto kang pangulitawhan ni Isagani. Magkita kuno mo unyang hapon sa Plaza Independencia. Pagkahuman sa atong klase."

"Sige moadto ko." Naghinamhinam ko.

Klasmet kami si Susie sa kursong Business Administration sa usa ka unibersidad sa siyudad. Matahom si Susie, nindot pa gyod og lawas. Very attractive sa mga lalaki. Samtang ako, dili matawag nga guwapa apan dili sab matawag nga batig nawong. Kasagaran lang ang akong hitsura. Hinuon, duna koy ikapanghambog, ug kini mao ang akong lawas nga sama’g coca cola body.

Pag-abot ko niadto sa Plaza Independencia, nakugang ko kay naghigda si Isagani sa mga paa ni Susie samtang naglingkod ang akong amiga sa konkretong lingkoranan sa punoan sa akasya. Nakapanglingo ko.

"Boyfriend nako si Isagani, Kristina."

Dako kaayo’g ngisi si Susie. Nakakatawa nalang ko sa pagka pilya sa akong amiga. Ug dihang nagkita kami sa unibersidad, mikatawa lang siya.

"Pilyaha gyod nimo, uy, Susie?" Gikusi ko na lang sa kilid ang akong amiga. "Abi ko’g makatrato na ko." Sukad sa akong pagka dalaga wala pa gyod ko makasulay og pagpakig-boyfriend. Unsaon, wala may nangulitawo nako.

Nanglabay ang mga adlaw. Graduating na kami si Susie sa kolehiyo. Unya gipangulitawhan ko ni Ronron, ang dugay ko nang gikaibgan sukad pa sa among paghayskol. Schoolmate kaming tulo si Ronron ug Susie sa hayskol. Maong nagkaila kaming tulo bisag nagpuyo kami sa managkalahi nga dapit sa siyudad. Hilom ko man tuod nga gimahal si Ronron apan wala ko dayon siya sugta.

"Unsa? Nangulitawo nimo si Ronron. Sus, ayaw gyod siya sugta, Kristina, kay trato ko na siya. Bantay lang tawhana kun mamisita siya nako!"

Nadiyong ang akong mga mata nga nagtan-aw sa akong amiga nga nasuko kaayo. Sa akong nakita kaniya, nakatuo ko nga nagsulti siya sa tinuod.

"Ayaw lang siya awaya, Susie. Maluoy ko niya. Na, frankly, love nako siya. Pero tungod nimo, di ko siya sugton." Nasugmoy ko. Wa gyod koy dag-anan sa akong amiga. Guwapa man god siya maong inilog sa mga lalaki.

"Thank you, ha, Kristina."

Puwerteng lipaya sa akong amiga nga gisaaran ko siya nga balibaran ko si Ronron sa iyang gugma nako. Nanglabay pa ang mga adlaw. Naglikay na ko kang Ronron. Dili ko gusto nga mahiubos kanako si Susie. Apan kausa, wala na ko makabalibad sa pag-atubang kang Ronron dihang gibisitahan niya ako sa among balay.

"Nganong gilikayan mo man ako, Kris?"

Gisulti ko kang Ronron ang tinuod nga hinungdan. Nanagko ang iyang mga mata sa kakugang.

"Di na tinuod, uy, Kris. Di ko girlfriend si Susie."

Sa misunod nga mga adlaw nasayran nako nga nagsulti si Ronron sa tinuod, ug si Susie maoy namakak. Busa, gisugot ko si Ronron. Malipayon ko sa among relasyon. Nasuta ko nga nagmatinud-anon siya sa iyang gugma kanako.

"Boyfriend mo na diay si Ronron, Kristina?"

Mituyo gyod sa pagpakigkita kanako si Susie. Gitando ko siya. Guol kaayo siya nga mitalikod kanako. Ug nakita ko nga mihilak ang pilya kong amiga. (Kataposan)