Kamatayon sa Panumpa

Gula 43

Misugod dayon si Xenia sa iyang trabaho pagkasunod gabii. Sanglit gi-briefing na man siya’g maayo ni Georgi sa wala pa magsugod ang pasundayag, dili na bakikaw alang niya ang paglihok-lihok ibabaw sa stage. Namatikdan niyang nalingaw ang mga kustomer sa club sa gidalit niyang mga kanta. Ni-appreciate sila sa iyang performance.

“Daghang salamat sa imong pagtabang,” giingnan ni Xenia si Penelope dihang nagkasulti sila sulod sa dressing room human sa pasundayag. “Kun di pa tungod nimo, tingalig di ko dawaton isip singer dinhi.”

“You deserve it, Xenia,” matud ni Penelope. “Igo lang kong nagrekomendar nimo. Gidawat ka ni Madam Minorka kay nakita niyang may katakos ka.”

“Pero nakatabang og dako ang imong gisulti ngadto sa manager nga singing champion ko kaniadto.”

“Kay tinuod man sab ang akong gisulti.”

Sa misunod nga mga gabii, gipanindot ug gipalambo pa gayod ni Xenia ang iyang performance sa pagkanta. Gusto siyang malingaw gyud og maayo ang mga kustomer sa club sa iyang performance.

Aron mapalambo gyud niya’g maayo ang iyang singing performance, mitan-aw siya’g lainlaing music video. Gitun-an niya’g maayo ang estilo sa mga singer. Nagustohan niya’g maayo ang estilo ni Britney Spears. Kini ang iyang gikuhaan og ideya pagpanindot sa iyang singing performance.-- Sumpayan pa