Daklit nga Kalipay

“Mora’g lawom kaayo ang imong gihuna-huna Stanly. Unsa ba ang gipanagsultihan ninyo ni Mama kaganina?” ni Tess pa nga nagpakisayud sa ulitawo.

Wala dayon makatubag si Stanly sa pangutana ni Tess. Apan pagkataud-taud, nakabaton ra siya’g igong kaisog. “Gihuna-huna lang nako ang kabuotan sa imong mga ginikanan Tess. Unya, wala usab ko magdahum nga wala ka g’yud diay gitago ngadto sa imong mga ginikanan kay lakip ang nahitabo kanato imo man nga gitug-an kanila.”

 “Wala ko’y gilimod kanila Stanly. Ayaw lang kabalaka kay wala man sila masuko kanato. Ang akong kalipay maoy ilang gilantaw,” ni Tess pa nga paraygon gihapon kaayo ngadto sa ulitawo.

Gigakus ni Stanly ang iyang hinigugma ug giukoban ang mga ngabil. Kadto maoy nakasugnib og laing kainit sa ilang mga pagbati ug misangpot sa pagromansahay. “Tana, adto ta sa kwarto kay basin og may makakita kanato dinhi sa sala,” agni ni Tess ngadto sa iyang hinigugma. Sa makausa pa gisubli nila ni Stanly ug Tess ang pagtagay sa lawasnong kalipay sulod sa lawak sa dalaga.

Nabug-os g’yud ang huna-huna ni Stanly nga iyang pakaslan si Tess. Wala molakaw si Stanly sa balay nila ni Tess ug gipaabut niya ang pag-abut sa mga ginikanan sa iyang hinigugma dihang miabut na ang kagabhion. 

“Uy, wala ka pa diay mopauli Dong,” matud sa inahan ni Tess. “Gituyo nako nga gihuwat ko kamo Manang Teresa kay pahibaw-on ko kamo nga nahukman na namo ni Tess nga magminyo na kami,” ni Stanly pa.

Nakalitan ang mga ginikanan ni Tess pagkadungog sa gisulti ni Stanly. “Ikalipay kaayo namo ni Temyong kun tumanon nimo ang pagpakasal ni Tess kay nakasabot kami nga daku kaayo siya og gugma kanimo Dong,” matud ni Manang Teresa.

Tuod milarga si Stanly balik dinhi sa dakbayan sa Sugbo pagkaugma. Usa ka semana ang milabay, miabut didto sa barangay Ablayan, Dalaguete si Stanly uban sa iyang mga ginikanan. Gikasabotan dayon ang kasal nila ni Stanly ug Tess. Buwan sa Mayo ang gikatakda nga kasal sa managhigugmaay.

Misamot ang kasuod nila ni Stanly ug Tess. Wala na moestar si Stanly sa iyang apohan kay didto na siya mopuyo sa balay nila ni Tess. Gani ipon na siya pagkatulog sa kwarto sa dalaga. Sa laktud, susama na gayud sila sa managtiayon.

Nagkaduol na ang buwan sa Mayo. “Tess, mopauli usa ko sa dakbayan sa Sugbo kay ipatrabaho nako ang atong nindot nga wedding ring ug asikasuhon nako ang ubang kalihukan sa atong kasal,” pananghid ni Stanly kang Tess usa ka adlaw niana. “Ayaw baya pagdugay sa siyudad Stanly ha kay mingawon g’yud ko nimo,” paraygon kaayo ang tingog ni Tess. “Sure, mobalik ko dayon kay mingawon man usab ko sa atong panaglagyo,” dali nga tubag sa ulitawo. (Sumpayan)