Bawion ko ang imong gugma

GULA 3

“Bahin sa unsa?” Sukit ni Annie.

“May kalabotan kini sa atong kaugmaon.”

Mikunot ang agtang ni Annie samtang gitutokan niya si Edelmar. Midiyong ang mga mata samtang nagtan-aw siya sa ulitawo.

“Hinaot nga masabtan ko nimo, An,” matud ni Edelmar.

“Ngano man diay, Ed?” Sukit ni Annie.

Gisuginlan siya ni Edelmar bahin sa plano niini. Giayo siya pagpasabot sa ulitawo. Apan imbes, malipay, nasubo pag-ayo si Annie kay ang gisulti ni Edelmar kaniya nagkahulogan man nga magkalagyo sila sa usa’g-usa.

“Molarga ka paingon sa Leyte?” Sukna ni Annie nga nakalitan sa gisulti ni Edelmar kaniya.

“Mao kanay nakab-ot kong desisyon, An,” nagkanayon si Edelmar. “May igsuon si Mama nga maayo na’g pagkabutang sa Ormoc. Duna sila’y negosyo didto. Mitanyag siya nga mogasto sa akong pagpadayon og eskuyla sa kolehiyo.”

“Kinahanglan ba gyud nga moadto ka sa Leyte?” Ngano man diay kun anhi ka lang eskuyla sa ato?”

“Maoy gusto sa akong uyoan nga adto ko sa Ormoc mo-eskuyla. Aron ba sab nga makatabang-tabang ko sa ilang negosyo sa panahon nga wa koy lingaw. Maayo na lang kini isip bugti sa ilang pagtabang nako aron maka-eskuyla.”

Wala motingog si Annie. Ang tinuod, supak sa iyang kabubut-on ang desisyon ni Edelmar. Dili siya buot nga magkalagyo sila.

Mitutok si Edelmar kaniya. Sa iyang pagtuo, nakamatikod ang iyang hinigugma sa pagmug-ot sa iyang panagway. -- Sumpayan pa