Daklit nga Kalipay

Human sa ilang makabuhong nga pagparayganay, nag-ilis dayon sila si Tess ug Stanly sa ilang mga sapot. Nanggawas dayon sila sa kwarto ug mibalhin sila sa lingkoranan sa hawanan sa balay.

"Wala ka ba magmahay sa nahitabo kanato Tess?" gisukna ni Stanly ang dalaga. "Wala uy…Naa ra nimo kun imo ba kong unongan o talikdan human sa nahitabo kanato Stanly," ni Tess pa nga may pagka seryoso sa iyang sinultihan. Gisud-ong ni Stanly ang panagway sa dalaga. Nagtinutokay silang duha. "Sayud ko nga duna ka nay hinigugma Stanly mao nga dili ko mamugos kun imo ra akong talikdan," matud ni Tess.

Wala makatingog si Stanly sa gisulti sa dalaga kaniya. Tinuod nga may hinigugma na si Stanly, usa ka call center agent nga dia magtrabaho sa dakbayan sa Sugbo, apan karon bisan sa kabag-o pa nila nga nagkahinigugmaay ug ni Tess, iyang natimbang-timbang nga mas bililhon kini kaniya.

Milabay pa ang mga adlaw, kanunay na g'yud nga si Stanly moadto sa balay nila ni Tess. Usa ka buntag, nananghid na usab ang inahan ni Tess nga moadto sila sa ilang uma.

"Didto ka una sa imong kwarto Tess, may panagsultihan lang kami kadiyot ug si Stanly," giingnan ni Manang Teresa si Tess nga dali usab kaayo mitalikud. Daw gikulbaan si Stanly kun unsay pakigsultihan kaniya sa inahan sa iyang hinigugma. Nakalitan g'yud ug wala makatuo si Stanly nga nasayran ni Manang Teresa nga may nahitabo na kanila ni Tess.

"Wala ililong ni Tess kanamo ni Papa niya ang nahitabo kaninyo niadtong kamo rang duha ang nahabilin sa balay Stanly. Ingon niana kamatinud-anon ang among anak. Wala usab namo ikasuko ang nahitabo kay nasabot namo nga gikalipay kini pag-ayo sa among anak," ni Nang Teresa pa.

Padayong nagpakahilom si Stanly. Miduko siya ug wala makaharong sa pagtutok sa inahan sa iyang hinigugma. "Sama ni Tess, kaming iyang mga ginikanan Dong Stanly, dili gayud mamugos kanimo nga pangasaw-on ang among anak bisan og may nahitabo na kaninyo. Ang amo lang ihangyo nga sa inyong panag-uban lipaya siya," matud ni Nang Teresa.

Gipikpik ni Nang Teresa ang abaga ni Stanly ug mitindog. "Tess, adto na kami sa uma anak. Pagluto lang unya og inyong makaon ni Stanly dinhi sa balay. Sige Dong biyaan ka una namo ni Temyong."

Pabiling nahimong amang si Stanly. Wala siya makatuo nga ingon niadto kabuotan ang mga ginikanan ni Tess. Wala sila masuko nga nasayud nga may nahitabo kanila ug sa ilang anak. Gani, gibiyaan na usab nila ang balay nga sila rang duha ang nahabilin. Napugwat si Stanly sa lawom nga paghanduraw kay gipikpik ni Tess ang iyang abaga. (Sumpayan)