Dakong kabaw nga mototoy pa

Sayes anyos na ang kamanghuran kong anak lalaki, wala pa kini moundang og totoy sa inahan. "Lutasa nana si Junjun," matud ko, "kay dako naman na aron makapahulay ka usab." "Unsaon man nako paglutas anang bataa nga masuko man ug motibaw kun dili ko patotyon," tubag sa akong asawa.

"Na, hala, bahala ka, ikaw ra man sab ang mahago."

Busa nagpadayon sa pagpatotoy ang inahan ngadto sa among kamanghuran. Usa ka higayon niana, didto kami sa birthday sa akong higala. Sa nag-ilis pa lang kami sa balay, nangutana si Junjun.

"Asa man mo si papa, ma?"

"Adto mi sa birthday sa iyang amigo."

"Unsa may inyong buhaton didto?"

"Di, mangaon mi didto."

"Unsa may inyong kan-on didto?"

"Litson, humba, pansit, naa say mga prutas, sama sa ubas, mangga, saging, pakwan ug uban pa."

"Daghana diay'ng pagkaon didto, ma no. Mokuyog ko ma."

"Oy, ayaw, kay daghan kaayog mga bisita didto."

"Mokuyog lagi ko!"

"Dili lagi mahimo kay daghang bisita didto."

Mikilisiw og tiyabaw si Junjun ug wala kini mamuhi sa pagakos sa tiil sa inahan.

"Tana, oy!" Akong giapura ang akong asawa, "higabhian ta."

"Unsaon man ni nga di man ni mamuhi?''

Nag-ilis dayon si Junjun nga labihang lipaya. Og didto sa birthday party, sa wala pa magsugod ang pangaon, gialirongan ang akong asawa sa iyang mga higalang mga babaye. Nagkinataw-anay sila ug nagkinumedyahay, hangtud nga may mikablit kaniya.

"Ma, patotya ko kay gutom ko." Labihang pangatawa sa nakadungog. "Mototoy pa na siya, Day, kadako na ana?'; matud sa usa ka higala.

"Ayaw dinhi'g totoy, Jun, kay daghang tawo, mauwaw ta," tubag sa akong asawa.

"Ngano man diay og daghang tawo, nga gigutom man ko."

Masuko si papa, mo kay iyaha ra ba ni," may sagol nga komedya ang tubag sa akong asawa.

"Ha! Mototoy pa diay na si papa nga kadako na nianang kabaw!''

Labihan ang pangatawa sa mga bisita. (Katapusan)