Anino sa Kulto

Gituman gayod ni Carlo ang saad niya ngadto ni Lexie Orioque nga magpakasal na sila kun masulbad na niya ang kaso nga iyang giatubang. Ang ilang kasal didto ipahigayon sa simbahan sa Guadalupe sa dakbayan sa Sugbo. Kini ang dapit nga gipili ni Lexie tungod kay usa man ka debuto ang babaye sa Birhen sa Guadalupe.

Daghang mga tawo ang nanambong sa ilang kasal. Sa habig ni Carlo, mitambong sila si Belen, Arlin, Jimmy ug Tiyo Berto. Kauban nila ang bata nga si Inday Shantal. Mitambong usab si Maj. Valera (nakadawat og promosyon) kay gidapit kini ni Carlo.

Sa habig ni Lexie, halos diha ang tanan niining mga kabanay ug suod nga mga higala. Mitambong usab ang mga kauban ni Lexie sa trabaho sa Sunlight Publications nga gipangulohan sa editor-in-chief sa Moon-Star Daily.

Samtang gipahigayon ang salosalo sulod sa hamugaway nga Sacred Heart Center, kalit naukay ang nanagmayang katawhan dihang nakadungog sila’g butobuto didto sa gawas sa kan-anan.

Mogawas unta si Carlo aron magsusi, apan maoy pag-abot sa usa ka lalaki gikan sa gawas, nagpahibalo nga usa diay ka isnatser ang gigukod sa polis. Misukol ang isnatser hinungdan nga napugos ang polis pagluthang niini. Igo lang nakapanglingo si Carlo.

Gipadayon ang pangaon. Apan si Carlo nagtimitimi. Dihay iyang gihunahuna nga makapakulba sa iyang dughan. Nabalaka siya. Dili kaha nga kadtong nahitabong pinusilay usa ka pasidaan sa bad omen sa iyang kaminyoon? Naatol ra ba gayod sa adlaw sa kasal nila ni Lexie. Ug diha pa gayod mahitabo duol sa lugar diin gihimo ang ilang reception. Apan dili siya gustong maghunahuna niini. Gisalig niya sa Dios ang tanan.

“Diyotay ra lagi ang imong gikaon,” buyag ni Lexie nga nakamatikod nga ingon sa wala siya’y ganang mokaon. “Busog na ko,” mubo niyang tubag.

“Mora’g may naghasol sa imong hunahuna,” daw gibasa sa babaye ang kinidlap sa iyang mga mata.

“Wala, uy,” niya pa nga mipahiyom og ahat. “Hasol gud. Gihunahuna ko lang ang mahitabo nato unyang gabii.” “Buing,” gikusnit ni Lexie ang iyang kilid.

Nahatukiki si Carlo. Ang tinuod, naghinamhinam gayod siya sa pag-abot sa kagabhion. Kay bisan makadaghan nang may nahitabo tali kanila ni Lexie, gusto niyang masinati ang katam-is sa panagsalo sa dugos sa gugma karon nga lisensyado na sila. -- Kataposan