Ang utang nga di mabayran

Hipodromo, Cebu CityNagkadaku na ang inyong utang kanako makabayad pa kaha mo niani? Ni Don Damaso pa. Mapugos ko sa pagpahawa ninyo dinhi sa hasyenda, kun di kamo makabayad. Maayong tawo ang Don, apan istrikto. Di siya buot nga maghatag og higayon nga adunay makatinonto ug ma-abusaran. Busa mangtas ang pag-ila kaniya sa mga tawo.

May dalaga kining anak nga maloloy-on, nga si Marialyn, tabunon apan gwapa. Mosekreto nga motabang niadtong makalolo-oy nilang mga saop. Kun masakpan, makalolo-oy pud siya sa kastigo sa iyang amahan.

Usa ka higayon ana, adlaw kadto nga tingsweldo.

"Nyor, kay utang na man lang ang akong makubra, di na gyud ko makabayad." Kahilakon si Alex, nga usa sa iyang sinaligan sa hasyenda, "motrabaho lang ko nga di na mobale aron maimpas ang utang ko. Mangayo lang ko’g bugas nga ikabangil sa gutom kong pamilya." Misugot ang Don kay gidasonan man kini sa hangyo ni Marialyn.

Unya. "Ayla'g kaguol Noy Alex. Akoy bahala sa imong anak nga si Adonis, sa pagpatiwas sa iyang pag-eskuyla didto sa Cebu." Matud ni Marialyn, dihang giubanan kini paggawas sa ilang mansion.

Milabay ang mga katuigan, nagkagrabe ang mga problema sa hasyenda. Gihugon-hugon man gud nga papahawon na, ang wa gyud makabayad sa utang. Tungod sa ka kabuotan ni Marialyn, napugngan ang mga dautang hulga gikan sa mga saop nga mangayo’g tabang, ngadto sa pundok sa mga walhon.

Apan dugay nang nahibaw-an sa maong pundok, ang problema sa mga saop. Busa, gipadad-an og sulat-pasidaan si Don Damaso.

"Kun di ka buot ... nga dunay mahitabo," samtang nagbasa ang Don, "kinahanglan impason mo ang utang sa mga saop nimo." Haskang lagota niya.

"Unsa ko, yabag? Ako na nooy mobayad sa mga utangan diri nako unya hadlokon pa ko? Nahayblad ang Don. Mibahad ning ireport sa kasundalohan.

Paglabay sa pipila ka semana," kalo-oy sa mga tawo didto sa nasud nga Japan," ni Don Damaso pa, nga nagsud-ong diha sa telebisyon. "Haskang kagrabe sa kadaut. Gilinog, unya gitsunami pa gyud. Gitiwasan pa, dihang may mibuto nga sama sa bombang nukleyar." Natandog ang balati-an niya ug unya, mipadala siya'g minilyon nga hinabang.

Sukad niadto, may mabatyagan nang mga linog dinhi sa atong nasud. Sama sa Cebu, mosayaw ang tag-as nga mga edipisyo. Didto sa hasyenda....

"Tabaaang!...." Misinggit si Marialyn. Nibuto ang ilang tinubdan sa ilang koryente.

Pagkataudtaod, may midila-ab nga sunog didto sa bodega sa hasyenda. Naigo diay sa kilat. Gihugopan dayon sa mga saop, aron di modaku ang kadaut. Wa madugay, mikurog ang yuta tungod sa grabeng linog.

"Ayaw mo'g karatol," matud sa sinaligang si Alex, nga midagan paingon sa mansion. Nanliki ug inanay kining natumpag.

"Dali mong tanan, anaa si Marialyn sa ilawom, nagpaninggit og tabang." Unya, buhing naugkat ang anak, samtang ang amahan, samdan ug nawad-an sa panimuot.

"Anak, magpasalamat ta Dios," sa Don pa," kay wa pa maimpas ang atong mga kinabuhi."

Didto sa ospital, nasayran sa Don nga, mga saop nila ang mingtabang aron sila maluwas sa maong panghitabo.

Gipatawag si Alex sa Don. Gisultihan," hatagi ang mga saop sa tanan nilang panginahanglan, ilabi na ang pag-ayo sa ilang pinuy-anan."

Dihang migawas na siya sa ospital, mediritso kini sa simbahan, aron mag-ampo.

'Salamat Ginoo, gikan karon, wad-on ko na ang utang sa akong mga saop, kay utangan ko'g kabubut-on nila, nga di gyud mabayran og salapi'. (Katapusan)